ზაფხულში ბენზინისა და დიზელის საწვავის იმპორტი გასული წლის ანალოგიურ პერიოდთან შედარებით, მნიშვნელოვნადაა გაზრდილი. როგორც ნავთობპროდუქტების იმპორტიორთა კავშირის თავმჯდომარემ ვანო მთვრალაშვილმა განაცხადა, ფინანსთა სამინისტროს მონაცემების მიხედვით, 2011 წლის ზაფხულის პერიოდში (ივნისი, ივლისი, აგვისტოს თვეები) საქართველოში იმპორტირებულ იქნა 231 129 641 კგ ბენზინისა და დიზელის საწვავი, რაც 21 976 648 კგ-ით აღემატება გასული წლის ანალოგიური პერიოდის მაჩვენებელს - 209 152 993 კგ. კერძოდ, 2011 წელს განხორციელდა 106 126 398 კგ ბენზინისა (2010 წელს - 99 104 398 კგ) და 125 003 243 კგ დიზელის საწვავის (2010 წ - 110 048 595 კგ) იმპორტი.
სულ მიმდინარე წელს აგვისტოს თვის ჩათვლით საქართველოში განხორციელდა 464 999 949 კგ ბენზინისა და დიზელის საწვავის იმპორტი. მათ შორის: ბენზინი - 219 402 930 კგ და დიზელის საწვავი - 245 597 019 კგ
უნდა აღინიშნოს, რომ ზაფხულის პერიოდში ზოგადად ყოველთვის იზრდება საწვავის მოხმარება, რაც განპირობებულია სხვადასხვა ფაქტორებით: პირველ რიგში, ეს არის შვებულებების სეზონი, როდესაც განსაკუთრებით აქტიურად ხორციელდება ავტომობილებით მოძრაობა შორი მიმართულებით; აქტიურ ფაზაში შედის ასევე სასოფლო-სამეურნეო სამუშაოები;
"ბენზინისა და დიზელის საწვავის იმპორტი გაიზარდა მიუხედავად იმისა, რომ ბოლო პერიოდში რეკორდულად მაღალია საწვავის ფასი, რის გამოც ბენზინის მრავალი მომხმარებელი გადავიდა ავტოგაზის მოხმარებაზე, რომელიც ბენზინთან შედარებით გაცილებით იაფია. შესაბამისად, მ/წლის ზაფხულის პერიოდში მნიშვნელოვნადაა გაზრდილი საწვავის მოხმარება საქართველოში გასული წლის ანალოგიურ პერიოდთან შედარებით. ეს ასევე გამომდინარეობს შემდეგი ფაქტორებით: მომატებულია სატრანზიტო გადაზიდვები; მნიშვნელოვნად იზრდება ასევე მოხმარება ინფრასტრუქტურული პროექტების განხორციელების შედეგად; საქართველოდან თურქეთისკენ ხდება საწვავის გადინება იმ მარტივი მიზეზის გამო, რომ თურქეთში თითქმის ორჯერ ძვირია საწვავის ფასი ჩვენთან შედარებით" - აცხადებს მთვრალაშვილი.
