აგვისტოში წინა თვესთან შედარებით საქართველოში ინფლაციის დონემ 1,1 პროცენტი შეადგინა. "საქსტატის" ინფორმაციით, მოცემულ პერიოდში ინფლაციის მაჩვენებლის ფორმირებაში ძირითადი გავლენა რამდენიმე ჯგუფებზე, ფასების ცვლილებამ იქონია. სურსათისა და უალკოჰოლო სასმელების ჯგუფის ფასები გაიზარდა 1,6 პროცენტით და მისმა წვლილმა აგვისტოს თვის ინფლაციაში 0,69 პროცენტული პუნქტი შეადგინა.
"საქსტატის" ინფორმაციითვე, ფასები მნიშვნელოვნად გაიზარდა შემდეგ ქვეჯგუფებზე: რძე, ყველი და კვერცხი ( 10,3 პროცენტით), ბოსტნეული, ბაღჩეული, კარტოფილი და სხვა ბოლქოვანები (4,5 პროცენტით), თევზეული (3,0 პროცენტით). ამასთან, ხილზე და ყურძენზე ფასები შემცირდა 8,0 პროცენტით.
მოცემულ პერიოდში, ტრანსპორტზე ფასები გაიზარდა 2,2 პროცენტით. ჯგუფის წვლილმა ინფლაციის საერთო მაჩვენებელში 0,25 პროცენტული პუნქტი შეადგინა. ფასები სატრანსპორტო მომსახურებაზე 3,2 პროცენტით გაიზარდა, საწვავზე - 1,9 პროცენტით.