"საქართველოს ფოსტისა" და "ლატარიის კომპანიის" ბიზნეს გარიგებაზე დღეს პირველი ოფიციალური კომენტარები გაკეთდა. ორი დამოუკიდებელი ბიზნეს-სუბიექტი აცხადებენ, რომ ამ გარიგებით მოგებულნი არიან რომ ეს გარიგება ორივე კომპანიას კიდევ უფრო მომგებიან სტრუქტურად აქცევს.
"ლატარიის კომპანიაში " განმარტავენ, რომ „საქართველოს ფოსტის" შესვლით მოგების ზრდა გარდაუვალი იქნება.
„მიუხედავად იმისა, რომ ჩვენ კომპანიის მხოლოდ 30%-იანი წილის მფლობელებად ვრჩებით, ჩვენი მოგება მაინც გაიზრდება," - ამის შესახებ „საქართველოს ლატარიის კომპანიის" სამეთვალყურეო საბჭოს წევრიმა ალექანდრე გოგოხიამ, "ლატარიის კომპანიისა" და "საქართველოს ფოსტის" ერთობლივ ბრიფინგზე განაცხადა.
მისი თქმით, სახელმწიფოსთან დადებული ბიზნეს-გარიგება ორივე კომპანიისთვის მომგებიანი იქნება.
კომპანიაში განმარტავენ, რომ ამ გარიგებით, მათ ლატარიის ბილეთების დისტრიბუციისა და რეგიონებში ოფისების შენახვის ხარჯები შემცირდება.
„საქართვლოს ფოსტა" უზრუნველყოფს ლატარიის ბილეთების მოსახლეობისთვის შეთავაზებასაც. ეს დიდ ხარჯებთან იყო დაკავშირებული. ვფიქრობთ, „საქართველოს ფოსტა" ბევრად ეფექტურად და ნაკლები დანახარჯებით განახორციელებს ჩვენი პროდუქტების რეალიზებას, რაც ლატარიის კომპანიის ბრუნვის ზრდას განაპირობებს. ჩვენ მოგება გვეზრდება. მოგებული რჩება სახელმწიფოც, რადგანაც გაზრდილი ბრუნვიდან ბიუჯეტში მეტი თანხის მობილიზება მოხდება", - აცხადებს ალექანდრე გოგოხია.
გარიგების მომგებიანობაზე საუბრობს „საქართველოს ფოსტის" სამეთვალყურეო საბჭოს თავმჯდომარე კახა ბაინდურაშვილიც. მისი განცხადებით, ახალი სერვისის დამატება კომპანიას ბევრად მომგებიანს გახდის.
„ეს ორი დამოუკიდებელი ბიზნეს-სუბიექტის გარიგებაა. ჩვენ ვცდილობთ რაც შეიძლება მომგებიანი გავხადოთ „საქართველოს ფოსტა". უნდა ავღნიშნო, რომ ლატარიის კომპანია სახელმწიფოს წინაშე აღებულ ყველა ვალდებულებას შეასრულებს" - განაცხადა ბაინდურაშვილმა.
შეგახსენებთ, რომ 9 აგვისტოს „საქართველოს ლატარიის კომპანიამ" სახელმწიფოს სასარგებლოდ 70%-იანი წილი დათმო. კომპანიის წილი სამართავად ეკონომიკის სამინისტრომ „საქართველოს ფოსტას" 5 წლის ვადით გადასცა.
