"ჯი.მარტ-ში" სარეალიზაციოდ განთავსებული და ჯი.მარტისვე წარმოებული პროდუქტი ყველა სტანდარტს შეესაბამება- ასეთი დასკვნა წარმოადგინა გუშინ, 1-ელ სექტემბერს სუპერმარკეტის ქსელის არაგეგმიური ინსპექტირებისას სურსათის უვნებლობის ეროვნულმა სააგენტომ.
სახელმწიფო კონტროლის ფარგლებში სააგენტომ "ჯი.მარტის" ორივე ობიექტი შეამოწმა. ინსპექტირება განხორციელდა "ჯი.მარტის" პურ-ფუნთუშეულის, მზა საჭმლის, ხორცის დამამუშავებელ საამქროებში. სააგენტოს ინსპექტორებმა გამოიკვლიეს როგორც სუპერმარკეტში არსებული პროდუქტის ვარგისიანობა და ხარისხი, ასევე სანიტარულ-ჰიგიენური მდგომარეობა.
"შემოწმებისას მარკეტებში არანაირი კრიტიკული და არაკრიტიკული შეუსაბამოებები არ დაგვიფიქსირებია."- განაცხადა სურსათის ეროვნული სააგენტოს მთავარმა სპეციალისტმა ელენე გიორგაძემ.
"ჯი.მარტის" არაგეგმიური შემოწმება სუპერმარკეტების ქსელის მენეჯმენტის თხოვნის საფუძველზე მოხდა. მიმდინარე წლის დასაწყისში სწორედ "ჯი.მარტის" ხელმძღვანელობამ მიმართა ნებაყოფლობითი, არაგეგმიური ინსპექტირების თხოვნით სურსათის უვნებლობის ეროვნულ სააგენტოს. შედეგად, კომპანიის ობიექტების შემოწმება სააგენტოს წლიურ გეგმაშიც შევიდა.
