2013-2014 წლებში აჭარის ბიუჯეტის საშემოსავლო გადასახადის განაკვეთი 18 პროცენტამდე შემცირდება. შესაბამისად 2013 წლის პროგნოზი განისაზღვრა 88 მლნ ლარით, ხოლო 2014 წლის 3,5 პროცენტიანი ზრდის გათვალისწინებით 91 მლნ. ლარის ოდენობით. 2015 წლისათვის განაკვეთი მცირდება 15 პროცენტამდე, შესაბამისად საშემოსავლო გადასახადის საპროგნოზო მაჩვენებელი შემცირდება 80 მლნ. ლარამდე.
აჭარის ფინანსთა და ეკონომიკის სამინისტროს ინფორმაციით, ავტონომიური რესპუბლიკის შემოსავლების ზრდა განპირობებულია საქართველოში ეკონომიკური და სოციალური ფონის გაუმჯობესებით, რაც განაპირობებს ახალი სამუშაო ადგილების შექმნას და დასაქმებულთა რიცხოვნობის ზრდას და სამეწარმეო სექტორის გააქტიურებას.