თუშეთთან დამაკავშირებელი საავტომობილო გზა 20 ოქტომბერს დაიხურება. ამის შესახებ კახეთის საინფორმაციო ცენტრს თუშეთის ეროვნული პარკის ადმინისტრაციის დირექტორმა ანზორ გოგოთიძემ განუცხადა.
„ბუნებრივი, ხელუხლებელი ეკოსისტემები დღეს უკვე იშვიათობაა. თუშეთის ეროვნული პარკი კი მსოფლიოში გამოირჩევა ბუნებრივი და კულტურული მემკვიდრეობით, რაც მნიშვნელოვანი ფაქტორია იმისათვის, რომ ყურადღება მივიპყროთ. გარდა ამისა, კეთილმოწყობილია ინფრასტრუქტურა. თუშეთში 28 საოჯახო სასტუმრო ფუნქციონირებს. ნატურალური პროდუქტები, გაუმჯობესებული საუბნო გზები, ჩეხეთის განვითარების სააგენტოს პროექტის ფარგლებში დამონტაჟებული მზის განათების სისტემები, ამ ყველაფერმა თუშეთში ტურიზმის განვითარებას ხელი შეუწყო. 2010 წლის აგვისტოში თუშეთს 2 618 ტურისტი ეწვია, წელს კი მათი რიცხვი 3 200-მდე გაიზარდა. მიმდინარე სეზონზე სამ თვეში სულ 6 615 ვიზიტორია დაფიქსირებული. თუშეთს სტუმრობდნენ ჩეხები, გერმანელები, ამერიკელები, ფრანგები, უკრაინელები და ადგილობრივი ტურისტებიც", - აღნიშნა ანზორ გოგოთიძემ.
ახმეტის რაიონის სოფელ ალვანიდან თუშეთამდე ტრანსპორტი შეუფერხებლად დადის. მგზავრობა 50 ლარი ღირს, სასტუმროს მომსახურება კი დღეში სამჯერადი კვებით 50 ლარი.
სექტემბრიდან ვიზიტორების მოზიდვის მიზნით, საოჯახო სასტუმროებში ფასდაკლება იქნება.
თუშეთის ეროვნული პარკი სექტემბრიდან ველურ ბუნებაზე დაკვირვების ტურების მოწყობასაც გეგმავს.