ენერგეტიკისა და ბუნებრივი რესურსების მინისტრმა ალექსანდრე ხეთაგურმა თუშეთში „შენაქოჰესი" გახსნა. 50-კილოვატი სიმძლავრის მცირე ჰიდროელექტროსადგური სოფელ შენაქოს 60-მდე ოჯახს ელექტროენერგიით მოამარაგებს. პროექტი აშშ-ის საერთაშორისო განვითარების სააგენტოს (USAID) პარტნიორმა ორგანიზაციამ „ვინროკ საქართველო" განახორციელა. ჰესის გახსნის ცერემონიალს საქართველოში ამერიკის შეერთებული შტატების ელჩი ჯონ ბასი დაესწრო.
„შენაქოჰესის" მშენებლობა აშშ-ის საერთაშორისო განვითარების სააგენტოს (USAID) მხარდაჭერითა და დაფინანსებით, ასევე მსოფლიო ბანკის, საქართველოს მაღალმთიანი რეგიონების განვითარების ცენტრისა და ქალთა ასოციაციის ფინანსური დახმარებით განხორციელდა, რაზეც 113 760 აშშ დოლარი დაიხარჯა. აქედან, USAID-მა პროექტის დასაფინანსებლად 87 ათასი აშშ დოლარი გამოყო.
გარდა ამისა, მიმდინარე წელს ენერგეტიკისა და ბუნებრივი რესურსების სამინისტრომ სოფელი შენაქოს მიმართულებით ელექტროგადამცემი ხაზი ააშენა. პროექტის ღირებულებამ 125 ათასი ლარი შეადგინა.
სოფელი შენაქოს ელექტროენერგიით მომარაგება რეგიონის სოციალურ-ეკონომიკური პირობების გაუმჯობესების კუთხით, პოზიტიურ შედეგს გამოიღებს და ამ სოფლებში მოსახლეობის შენარჩუნებას უზრუნველყოფს. 85 კმ-იანი გადამცემი ხაზის დაზიანების გამო, სოფელ შენაქოს 1988 წლის შემდეგ ელექტროენერგია არ მიეწოდებოდა
