ახალი თაობის პირადობის მოწმობის - ID ბარათების აღება საქართველოს მოქალაქეებს დღეიდან გურიის, სამეგრელოს, შიდა და ქვემო ქართლის, კახეთის, მცხეთა-თიანეთის ტერიტორიულ სამსახურებში უკვე შეეძლებათ, ხოლო სექტემბრის ბოლოს კი ელექტრონული პირადობის მოწმობების გაცემა ქვეყნის მთელ ტერიტორიაზე მოხდება.
როგორც დღეს იუსტიციის სამინისტროს სამოქალაქო რეესტრის სააგენტოს თავმჯდომარის მოადგილემ გიორგი გაბრიელაშვილმა ბრიფინგზე განაცხადა, ID ბარათის მიღების დროს მოიხსნა ტერიტორიული შეზღუდვა.
რეგისტრაციის ადგილის მიუხედავად, მოქალაქეებს ID ბარათის მიღება იუსტიცის სახლებსა და სამოქალაქო რეესტრის სააგენტოს ნებისმიერ ტერიტორიულ სამსახურებში შეეძლებათ.
"ადრე ადამიანებს პირადობის მოწმობის გამოსაცვლელად, ან აღსადგენად რეგისტრაციის ადგილის მიხედვით უწევდათ გამოცხადება შესაბამის სამსახურებში, ახალი სერვისით კი მოქალაქე დაზოგავს დროსა და ხარჯებს. მნიშვნელოვანია ის, რომ ახალ ელექტრონულ პირადობის მოწმობაზე არ არის დატანილი მოქალაქის მისამართი. თუ ადამიანი საცხოვრებელ მისამართს შეიცვლის, იგი აღარ იქნება ვალდებული გამოცვალოს ID ბარათი", - გაბრიელაშვილმა.
შეგახსნებთ, რომ ID ბარათის გაცემა 1 აგვისტოდან დაიწყო და ამ დრომდე ელექტრონული პირადობის მოწმობა 10 000-მდე მოქალაქემ მიიღო. თავდაპირველად ID ბარათები მხოლოდ თბილისის ტერიტორიულ სამსახურებში, ბათუმისა და რუსთავის იუსტიციის სახლებში გაიცემოდა.
