ბათუმის კლუბებისა და ბარ-რესტორნების მფლობელები წლევანდელ სეზონს "ჩავარდნილს" უწოდებენ. როგორც "ჯი-ეიჩ-ენთან" საუბარში "ბამბა რუმის" ერთ–ერთმა მფლობელმა, გიორგი ბოჭორიშვილმა აღნიშნა, წელს ასეთ სეზონს ნამდვილად არ ელოდნენ.
"ახლა ვფიქრობთ, რა იყო წლევანდელი სეზონის ჩავარდნის მიზეზი. მხოლოდ ორი რამ შემიძლია დაგისახელოთ: პირველი ის, რომ ჩვენი კლუბი ახალ ბულვარშია, შესაბამისად, ხალხს იქ ეზარება მისვლა და მეორე - წელს საქართველოში, წინა წლებთან შედარებით, ბევრად ნაკლები ტურისტი იყო", - თქვა ბოჭორიშვილმა.
ამასთან, დიჯეები, რომლებიც ქართველმა ორგანიზატორებმა წელს ბათუმში ჩამოიყვანეს, მასაზე გათვლის მიზნით, კლუბიდან კლუბში ინაცვლებდნენ.
"იმ დიჯეების საღამოები, რომლებიც ჩვენ ჩამოვიყვანეთ, უფრო მასაზეა გათვლილი. ამიტომ ვცდილობდით, თითოეულისთვის ისეთი გარემო შეგვექმნა, რომ ხალხი ყოფილიყო. "ბამბა რუმში" სტუმრები იყვნენ, თუმცა დიდი რაოდენობით არა, ამიტომ ბოლო საღამო სხვა კლუბში მოვაწყვეთ", - აცხადებს "ფლაბოურის" დამფუძნებელი გვანცა ჯანაშია.
მიუხედავად ამისა, ბათუმის წლევანდელი სეზონი, მეისი გრეისა და ენრიკე იგლესიასის სტუმრობით, "არქივში" მაინც "ოქროს ასოებით" შევა.
