მომხმარებლები „კახეთის ენერგოდისტრიბუციას" სემეკ-ის დადგენილების დარღვევაში ადანაშაულებენ. ენერგოსადისტრიბუციო კომპანია ვალდებულია აბონენტებს ქვითარი სახლში მიაწოდოს, რასაც ის არ აკეთებს.
კახეთის საინფორმაციო ცენტრის კორესპონდენტებმა დღეს გურჯაანის და დედოფლისწყაროს სერვის - ცენტრებში სხვადასხვა სოფლებში მცხოვრები 60 აბონენტი გამოკითხეს. გამოკითხულთაგან 56 მომხმარებელმა განაცხადა, რომ კომპანია მათ ქვითარს არ უგზავნის; 3 - მა მომხმარებელმა აღნიშნა, რომ ქვითარი მაღაზიაში დაუტოვეს, საიდანაც თავად წაიღეს; მხოლოდ ერთმა აბონენტმა აღნიშნა, რომ ქვითარი სახლში მიუტანეს.
სემეკ-ის დადგენილებით განსაზღვრულია, რომ აბონენტმა მოხმარებული ელექტროენერგიის საფასური ქვითარში მითითებულ ვადაში უნდა გადაიხადოს, რომელიც არ უნდა იყოს 15 კალენდარულ დღეზე ნაკლები. ასევე, ქვითარში უნდა იყოს მითითებული დარიცხული თანხის გადახდის ვადა, ტარიფი, მოხმარებული ელენერგიის რაოდენობა, ადგილი სადაც თანხის გადახდაა შესაძლებელი. ხოლო, მეორე მხრიდან ქვითარზე მითითებული უნდა იყოს პრეტენზიების განმხილველი სამსახურის მისამართი და საკონტაქტო ტელეფონები.
აბონენტების თქმით, ენერგოსადისტრიბუციო კომპანიას გადახდის მცოცავი გრაფიკი აქვს. კომპანია თანხის გადახდის ბოლო დღედ ხან 16, ხან 17 და ხან 19 რიცხვს აწესებს. ქვითრის არ ქონის გამო აბონენტები თანხის დროულად გადახდას ვერ ახერხებენ და მათ ერთი დღით ვადაგადაცილების შემთხვევაშიც კი დეპოზიტის სახით დამატებით თანხას აკისრებენ.
„კახეთის ენერგოდისტრიბუციის" გურჯაანის და დედოფლისწყაროს სერვის - ცენტრებში მოხმარებლების პრეტენზიებს არასწორი უწოდეს. მენეჯერების განცხადებით, ისინი აბონენტებს ქვითარს საცხოვრებელ მისამართზე უგზავნიან.
