სიმინდისა და მზესუმზირის ამღები ულტრათანამედროვე კომბაინები დღეს, სოფლის მეურნეობის სამინისტროს, ამერიკის მთავრობის სახელით აშშ-ს სრულუფლებიანმა ელჩმა საქართველოში, ჯონ ბასმა საჩუქრად გადასცა. ეს პროექტი საქართველოს სოფლის მეურნეობის განვითარების მხარდაჭერის პროგრამის ფარგლებში ხორციელდება. უახლესი ტექნიკის პრეზენტაციას საქართველოს სოფლის მეურნეობის მინისტრი ბაკურ კვეზერელი, ამერიკის სრულუფლებიანი ელჩი საქართველოში ჯონ ბასი და ფერმერები ესწრებოდნენ.
,,ჩვენ, მომავალშიც ვაპირებთ გავაგრძელოთ თანამშრომლობა აღნიშნული მიმართულებით ამერიკის მთავრობასთან, რათა მოხდეს ჩვენი ფერმერების დამატებითი ტექნიკით აღჭურვა, რაც მნიშვნელოვნად შეუწყობს ხელს საქართველოს სოფლის მეურნეობის განვითარებას. უახლესი ტექნიკა ფერმერებს საშუალებას მისცემს შეამცირონ დანახარჯები და მიიღონ მაღალხარისხიანი პროდუქცია, რაც უფრო მეტად ბიზნესორიენტირებულს გახდის სოფლის მეურნეობის სექტორს", - განაცხადა სოფლის მეურნეობის მინისტრმა.
,,ეს პროექტი ქართველი და ამერიკელი ხალხის თანამშრომლობის ნაყოფიერი შედეგია. საქართველოს წარმატება დამოკიდებულია მისი ეკონომიკის აღმავლობაზე, რასაც სოფლის მეურნეობის განვითარებასაც უწყობს ხელს. ჩვენ მომავალშიც აუცილებლად გავაგრძელებთ თანამშრომლობას და მზად ვართ გვერდში დაუდგეთ საქართველოს"- განმარტა ამერიკის ელჩმა, ჯონ ბასმა.
სოფლის მეურნეობის სამინისტროს ინფორმაციით, ათი ერთეული ამერიკული ულტრათანამედროვე სიმინდისა და მზესუმზირის ამღები კომბაინები საქართველოს სხვადასხვა რეგიონში გადანაწილდება და შემოდგომაზე მოსახლეობა მოსავლის აღებას უკვე ამ უახლესი ტექნიკით შეძლებს. ამერიკული წარმოების ეს უნივერსალური, 300 ცხენისძალის სიმძლავრის კომბანი საშუალებას იძლევა მოსავლის აღება მინიმალური დანაკარგებით მოხდეს.
