ხვალ. 24 აგვისტოს საქართველოს პროფესიული კავშრების გაერთიანება ქობულეთში სასტუმროს ტიპის კომპლექსს ოფიციალურად გახსნის.
გაერთიანების ინფორმაციით, სასტუმრო კომპლექსი ქობულეთში, აღმაშენებლის #269-ში არსებული, ფაქტობრივად, დანგრეული სამკურნალო პოლიკლინიკის ბაზაზე გაკეთდა. შენობას ჩაუტარდა კაპიტალური რეკონსტრუქცია და აღიჭურვა შესაბამისი ინვენტარით.
დღეისთვის, ქობულეთის სასტუმრო კომპლექსი „სოლიდარობა" წარმოადგენს 116-ადგილიან დასასვენებელ კომპლექსს, ლუქს-ნომრებითა და საკონფერენციო დარბაზით, რაც სემინარების, შეხვედრებისა და სხვადასხვა ტიპის კონფერენციების ჩატარების შესაძლებლობას იძლევა.
„ჩვენ, ჩვენი უცხოელი მეგობრების, პროფკავშირების საერთაშორისო ორგანიზაციების დახმარებით, შევეცადეთ, შეგვექმნა ადგილი, სადაც ჩვენი წევრები ხარისხიან დასვენებასა და ხარისხიანი განათლების მიღებას ერთდროულად მოახერხებდნენ. ეს იქნება სწავლება-გადამზადების რეგიონული ცენტრი აღმოსავლეთ ევროპის, ამიერკავკასიისა და შუა აზიის პროფკავშირელი მუშაკებისთვის, თუმცა, აქ მოსვლა, დასვენება, შეხვედრების ჩატარება, სხვებისთვისაც ხელმისაწვდომია. იმედი მაქვს, ჩვენი ცენტრი თავის წვლილს შეიტანს აჭარის გალამაზებაში, საქართველოს ეკონომიკის განვითარებაში."- აცხადებს საქართველოს პროფესიული კავშირების გაერთიანების თავმჯდომარე ირაკლი პეტრიაშვილი.
