რუსთაველის თეატრის მსახიობი რამაზ ჩხიკვაძე რობერტ სტურუას თანამდებობიდან გათავისუფლებას "სამარცხვინოს" უწოდებს და აცხადებს, მსოფლიოს მიერ დასაცინი ფაქტი შეიძლება გახდეს, ქართულ კულტურაში მისი გრანდიოზული შემოქმედების ადგილი რომ არ აღმოჩნდა.
"რობერტ სტურუა იყო და უნდა ყოფილიყო კიდეც დიდხანს რუსთაველის თეატრში დასის სამხატვრო ხელმძღვანელად... რაშია საქმე? რა შუაშია რუსთაველის თეატრი და ხელოვნება იმასთან, როც მან თქვა პრეზიდენტის სომხობასა თუ არასომხობასთან დაკავშირებით? რუსთაველის თეატრი რა შუაშია? ის ერთი და ორი კაცისა ხომ არ არის. ის მთელი საქართველოს მაცხოვრებლებისაა. მინდა, ქართველი კაცი იყოს საქართველოში პრეზიდენტადო, ეს თქვა, მეტი არაფერი. მას არ უთქვამს, რომ სომხების წინააღმდეგია და სომხებისთვის არ უგინებია...ხელოვნება ხელოვნებაა, საქმე საქმეა, პოლიტიკური გააზრება სულ სხვაა. იმსჯელეთ, ბატონო, პოლიტიკურ მოსაზრებაზე, იმაზე, სწორია თუ არა ის. მაგრამ ხელოვნება აქ არაფერ შუაშია",- აღნიშნა რამაზ ჩხიკვაძემ მედიაკავშირ "ობიექტივთან" სატელეფონო საუბარში.
მისივე თქმით, სამწუხაროა არა მხოლოდ ის, რომ სტურუა საშინელი კრიტიკის ქარცეცხლში გაატარეს, არამედ მთელ მის შემოქმედებით მოღვაწეობას "ხაზი გადაუსვეს და თქვეს, რომ მას არაფერი უკეთებია".
"ვის აქვს იმის თქმის უფლება, რომ რობერტ სტურუას არაფერი უკეთებია? ამით ვის მოატყუებთ?! სირცხვილი არ არის? როგორ, მაინც და მაინც ლონდონიდან გინდათ შემოგითვალონ, რას ლაპარაკობთ, ასეთი ამბავი სად გაგონილაო? ჩვენ რა, სულელები ვართ, რობერტის შემოქმედებას ასეთ გრანდიოზებს შორის რომ მივეცით ადგილიო?, - აღნიშნა რამაზ ჩხიკვაძემ.
ამასთან, მსახიობმა ისიც დასძინა, რომ ის უერთდება რუსთაველის თეატრის ახალი და ძველი თაობების მიმართვას, რომლებიც რობერტ სტურუას თეატრში დაბრუნებას მოითხოვენ.
"თუ რობერტს ისე აქვს გული გაციებული და ისეა შეურაცხყოფილი, რომ თეატრში მუშაობა აღარ უნდა, ეს სხვა საქმეა. მაგრამ არ შეიძლება, ასეთ განცხადებას ხელი არ მოაწერო და მას მხარი არ დაუჭირო. ქართველ ხალხს მივმართავ, არ დაიჯერონ ნათქვამი, თითქოს რობერტს არაფერი გაუკეთებია. თუ ერთ ადამიანს მაინც აქვს ნანახი მისი თუნდაც ერთი სპექტაკლი, ის არ დაიჯერებს იმას, თითქოს მისი შემოქმედება არ ვარგა",- დასძინა ჩხიკვაძემ.
შეგახსენებთ, რომ რამაზ ჩხიკვაძე მკურნალობის მიზნით ჩეხეთში იმყოფება და ის საქართველოში ხვალ უნდა დაბრუნდეს.
მასალის გამოყენების პირობები
