დღეს მოქმედი ნორმის თანახმად, შეკრებისათვის ან მანიფესტაციისათვის, აგრეთვე მასში მონაწილეობის უფლების განხორციელებისათვის ხელის შეშლა სამსახურებრივი მდგომარეობის გამოყენებით - გამოიწვევს დაჯარიმებას შრომის ანაზღაურების ორმოცდაათიდან ას მინიმალურ ოდენობამდე.

პარლამენტში ინიცირებულ კანონპრექტში კი აღნიშნული მუხლი ამოღებულია, თუმცა უცვლელად რჩება შეკრების ან მანიფესტაციის ორგანიზებისა და ჩატარების წესის დარღვევაზე დაწესებული ჯარიმები.

კერძოდ კი, შეკრების ან მანიფესტაციის ორგანიზებისა და ჩატარების წესის დარღვევისთვის ჯარიმის ოდენობა 500 ლარია, იგივე ქმედება, რომელიც ჩადენილია ორგანიზატორის მიერ იწვევს დაჯარიმებას 5000 ლარის ოდენობით.

სასამართლოს შესასვლელის ბლოკირება, შეკრების ან მანიფესტაციის ჩატარება მოსამართლის საცხოვრებელ ადგილას ან საქართველოს საერთო სასამართლოში ანდა მისგან ოცი მეტრის რადიუსში მდებარე ტერიტორიაზე გამოიწვევს ადმინისტრაციულ პატიმრობას 90 დღემდე ვადით.

„შეკრებებისა და მანიფესტაციების შესახებ" საქართველოს კანონის მე-9, მე-11 და 111 მუხლებით გათვალისწინებული ნორმების დარღვევა კი გამოიწვევს ჯარიმას 500 ლარის ოდენობით ან/და ადმინისტრაციულ პატიმრობას 90 დღემდე ვადით, ხოლო თუ დამრღვევი ორგანიზატორია - ჯარიმას 5 000 ლარის ოდენობით ან პატიმრობას 90 დღემდე ვადით.