მომავალი წლიდან სოფლის მეურნეობის სამინისტრო ფერმერებს ახალი ჯიშის ხორბალს შესთავაზებს. საქართველოში შემოტანილი მარცვლეული კულტურების სათესლე მასალა უკვე გამოიცადა და მაღალი მოსავლიანობა აჩვენა. სოფლის მეურნეობის სამინისტროში განმარტავენ, რომ სართიჭალის საცდელ მეურნეობაში დათესილი მზესუმზირა, ხორბალი და სიმინდი მინიმუმ გაორმაგებულ მოსავალს იძლევა.
სამინისტროს ინფორმაციით, მომავალი წლიდან სოფლის მეურნეობის სამინისტრო ფერმერებსა და გლეხებს ამერიკული ჯაგერის შემდეგ, ახალი ჯიშის ხორბალს შესთავაზებს. "ფულერი" საქართველოს კლიმატურ პირობებთან და ნიადაგთან შეთავსებადია და საჰექტრო მოსავლიანობის კარგ შედეგებს იძლევა. საქართველოს სოფლის მეურნეობის სამინისტრო ახალი მარცვლეული კულტურების ახალი ჯიშების გამოცდით და მათი დანერგვით, ადგილობრივი წარმოების ინტენსიფიკაციისა და ქვეყანაში სასურსათო უსაფრთხოების უზრუნველყოფის მიზნით დაინტერესედა.
"ჩვენი მიზანია, რომ უახლოეს მომავალში გავზარდოთ საშუალო მოსავლიანობა, გავაორმაგოდ და ზოგიერთ შემთხვევაში გავასამმაგოთ. ეს ძალიან მნიშვნელოვანია როგორც გლეხებისთვის და ფერმერებისთვის, ასევე მთლიანად ქვეყნის ეკონომიკისთვის. ეს ნიშნავს, რომ ჩვენ გვექნება უფრო ნაკლები იმპორტი და ამ კონკრეტული კულტურებიდან მეტი შემოსავალი დარჩება ქართველ გლეხებსა და ფერმერებს", - განაცხადა სოფლის მეურნეობის მინისტრმა ბაკურ კვეზერელმა.
