#6, #32, #109, #122, #147და #171 სამარშრუტო ტაქსით მგზავრობა 50 თეთრიდან 80 თეთრამდე გაძვირდა. ჯერ-ჯერობით ზუსტად არაა ცნობილი კიდევ რომელ სამარშრუტო ხაზებზე მოხდა მგზავრობის გაძვირება.
თავად მძღოლები ამტკიცებენ, რომ მგზავრობის ღირებულების გაძვირება მათ "ზევიდან" აძულეს.
„ჯი-ეიჩ-ენთან" საუბრისას თბილისის მერიის წარმომადგენლები აცხადებენ, რომ ფასის გაძვირების პროცესი მერიისგან დამოუკიდებლად ხდება.
„ფასის გაძვირებასთან დაკავშირებით უნდა მიმართოთ კომპანიას და მძღოლებს. ჩვენ არაფერ შუაში არ ვართ", - განუცხადეს „ჯი-ეიჩ-ენს" თბილისის მერიაში.
აღსანიშნავია, ისიც რომ დედაქალაქის მესვეურები მათ შორის საკრებულოს თავჯდომარის მოადგილე მამუკა ახვლედიანი ირწმუნებოდნენ, რომ მგზავრობის ღირებულება არ გაიზრდებოდა.
რამდენიმე დღის წინ #4-ზე მარშრუტზე ახალი მკიროავტობუსების გამოჩენის შემდეგ გაკეთდა განცხადება, რომ ღირებულება მხოლოდ ამ მარშრუტზე გაიზრდებოდა.
შეგახსენებთ, რომ აქამდე, ჟურნალისტებთან გაკეთებულ კომენტარებში „თბილლაინის" წარმომადგენელი დავით ასანიძე ირწმუნებოდა, რომ ე.წ. ახალი „მარშუტკების" შემოყვანის შემდეგ მგზავრობის საფასური არ გაიზრდებოდა. თუმცა გაზეთ „რეზონანსთან" საუბარში მანვე განაცხადა, რომ „მგზავრობის საფასურის 80 თეთრამდე გაზრდაზე საუბარი მიმდინარეობს და ეს, სავარაუდოდ, ასეც მოხდება".