მთავრობამ ბიზნესს ანგარიში ჩააბარა და მომავალი ექვსი თვის გეგმები გააცნო. პრემიერ-მინისტრი, ფინანსთა მინისტრი და ეროვნული ბანკის პრეზიდენტი დღეს მსხვილი ბიზნესწრეების წარმომადგენლებს შეხვდნენ, თუმცა პრემიერ-მინისტრის აპარატის მიერ შერჩეულ ბიზნესმენებში ქვეყნის მრავალი მსხვილი ბზიენსმემნი ვერ მოხვდა.
მთავრობის წევრებისა და კერძო სექტორის წარმომადგენელთა შეხვედრაზე საუბარი ქვეყნის მაკროეკონომიკურ პარამეტრებზე, ბიზინეს გარემოს გაუმჯობესებაზე და პარლამენტის მიერ სულ ახლახანს დამტკიცებულ, თავისუფალ ეკონომიკურ აქტზე იყო. პრემიერ-მინისტრი ნიკა გილაური ამბობს, რომ მთავრობა 10-პუნქტიან სტრატეგიული განვითარების გეგმას პირნათლად ასრულებს.
"ჩვენ წლის დასაწყისი საზოგადოებას 10-პუნქტიანი სტრატეგიული განვითარების გეგმა წარვუდგინეთ. ეს გეგმა მოიცავს რამდენიმე ასპექტს, მაკროეკონომიკური სტაბილურობიდან დაწყებული სოფლის მეურნეობის, ტურიზმისა და ექსპორტის განვითარებით დამთავრებული. ჩვენ გვინდა, რომ ყოველ 6 თვეში შევხვდეთ საზოგადოებას და ანგარიში გავაცნოთ და ასევე თუ რას ვაპირებთ მომავალი 6 თვის განმავლობაში. ჩვენ დღეს ვხვდებით 40-50 მსხვილ ბიზნესმენს და გვინდა მათ გავაცნოთ 6 თვის შედეგები და მოვისმინოთ მათგან თუ რა გეგმები აქვთ, რას ელიან ისინი და რა შენიშვნები აქვთ"- განაცხადა ნიკა გილაურმა შეხვედრის დაწყების წინ, რომელიც სასტუმრო "შერატონ მეტეხი პალასში" გაიმართა.
პრემიერ-მინისტრი აცხადებს, რომ ქვეყანას ვალის გადახდის პრობლემა ჰქონდა, თუმცა მთავრობის აქტიური მუშაობის შედეგად პრობლემა დღისწესრიგიდან მოხსნილია და დღეს საქართველოს ევროობლიგაციები ნებისმერი ევროპული ქვეყნის ობლიგაციაზე უკეთესად იყიდება.
"გასული 6 თვის შედეგებს მაკროეკონომიკური პარამეტრებიდან ხაზს რამდენიმე ასპექტს გავუსვამდი. ერთია საგარეო ვალის პრობლემის გადაჭრა - მოგეხსენებათ ქვეყანას საგარეო ვალის პრობლემა ქონდა და 2012-2013 წლებში ქვეყანას ძალიან დიდი თანხა უნდა გადაეხადა, თუმცა გაზაფხულზე ჩვენ ევროობილიგაციები გამოვუშვით, რომელიც წარმატებული ტრანზაქცია იყო და რომელიც ივაჭრება ბევრ ევროპულ ფასიან ქაღალდებზე კარგად, მათ შორის იტალიურ ფასიან ქაღალდებზე უკეთესად. შესაბამისად გადავუწყვიტეთ ქვეყნის საგარეო ვალის პრობლემა.
აღსანიშნავია ასევე, ბიუჯეტის დეფიციტის შემცირება. ჩვენ წელი დავიწყეთ 4,5 %-იანი საბიუჯეტო დეფიციტით და ის 3,5 %-მდე შევამცირეთ. მნიშვნელოვანია, რომ მთავრობას შესაძლებლობა აქვს ძალიან მცირე პერიოდში სწრაფად შეამციროს საბიუჯეტო დეფიციტი.
ინფლაციის მაქსიმალური დონე 14,3 % იყო და ყოველთვიურად იზრდებოდა, თუმცა დღეს უკვე შემცირების კარგი შედეგი გვაქვს და გასული თვეს დაფიქსირდა 10 %-იანი ინფლაცია. რაც უკვე ძალიან დადებითი და პოზიტიური ძვრა არის"- აღნიშნა ნიკა გილაურმა.
პრემიერ-მინისტრმა განაცხადა ასევე ისიც, რომ თავისუფლების აქტი, რომელიც პარლამენტმა რამდენიმე დღის უკან მიიღო, მნიშვნელოვანია ინვესტორებისთვის და მნიშვნელოვანი ფაქტორია ასევე იმ მიმართულებითაც, რომ ქვეყანაში დასაქმება გაიზარდოს.
"მაკროეკონომიკური მაჩვენებლები საკმაოდ გაზრდილია, თუ ავიღებთ მაგალითად პირდაპირ უცხოურ ინვესტიციებს გაზრდილია 2,5 ჯერ, გაზრდილია ასევე ავტომობილების რეგისტრაცია, საკუთრების რეგისტრაცია და ექსპორტი", - აცხადებს გილაური.
ბიზნესომბუდსმენი კი ამბობს, რომ თავისუფალი ეკონომიკური აქტის მიღებით მთავრობა ერთგვარ დათმობებზე წავიდა, რაც მთავრობას სამომავლოდ გადასახადების გაზრდას გაურთულებს.
"მისი მიღება ძალიან მნიშვნელოვანია. ფაქტობრივად ეს არის მთავრობის გადაწყვეტილება, რომ სამომავლოდ გადასახადების გაზრდა აღარ იქნება ისე მარტივად განსახორციელებელი, როგორც ეს აქამდე იყო. ეს არის გარკვეული მესიჯი როგორც ადგილობრივი ასევე უცხოელი ინვესტორებისათვის, რომ გადასახადები არ გაიზრდება. მსოფლიოში არ მეგულება საზოგადოება, რომელიც რეფერენდუმის დროს გადასახადის გაზრდას დაუჭერდა მხარს", - განაცხადა ბიზნეს ომბუდსმენმა გიორგი პერტაიამ.
ფინანსთა მინისტრის აზრით, მთავრობის წევრებისა და კერძო სექტორის წარმომადგენელთა შეხვედრა სისტემატიურად იმართება, რაც მთავრობასა და ბზინეს ურთიერთობების გაღრმავებაში დაეხმარება.
"შეხვედრის მთავარი მიზანია ბიზნესსა და მთავრობას შორის ურთიერთობების გაღრმავება. მთავრობა ბიზნესს სამ ძირითად გზავნილს უგზავნის: პირველი ეს არის სტაბილური მაკროეკონომიკური გარემო, მეორე - ხელსაყრელი ბზინეს გარემოს - ეს არის სამართლიანი საგადასახადო ადმინისტრირება და მესამე - ეს არის ქვეყანაში მიმდინარე და უკვე განხორციელებული ლიბერალური რეფორმების შეუქცევადობას"- განაცხადა ფინანსთა მინისტრმა დიმიტრი გვინდაძემ.
შეხვედრაზე ეროვნული ბანკის პრეზიდენტმა ბიზნეს 6 თვის მაკროეკონომიკური პარამეტრები დეტალურად გააცნო.
"ჩვენთვის ძალიან მნიშვნელოვანია, რომ ბიზნესს და კონკრეტულად მსხვილ ბიზინესს, კარგად ესმოდეს ეკონომიკაში მიმდინარე ტენდენციები., რაც გაუადვილებს მათ გადაწყვეტილების მიღებას.
მნიშვნელოვანია, რომ ინფლაცია ერთნიშნა ნიშნულს დაუბრუნდა. ჩვენ არაერთხელ ვთქვით, რომ ფასების ზრდა გამოწვეული იყო ეგზოგენური ფაქტორებით. კერძოდ მსოფლიო ბაზარზე სასურსათო პროდუქციის ფასების ზრდით, მოსავლის აღებისა და დაბინავების შემდეგ ფასები მთელს მსოფლიოში და მათ შორის საქართველოშიც დასტაბილურდა და შემცირდა. აღსანიშნავია ასევე ტურიზმიდან შემოსავალი, რომელიც ძალიან დიდი ტემპით იზრდება. ჯამურად მაკროეკონომიკური პარამეტრები ჩვენს მოლოდინებთან და პროგნოზებთან არის შესაბამისობაში", - განაცხადა სებ-ის პრეზიდენტმა გიორგი ქადაგიძემ შეხვედრის დაწყების წინ.