"თავისუფალი საქართველო" სამარშრუტო ტაქსებით მგზავრობის საფასურის გაძვირებას აპროტესტებს.
როგორც პარტიის მიერ გავრცელებულ განცხადებაშია აღნიშნული, ეს გადაწყვეტილება ეწინააღმდეგება როგორც მოსახლეობისა და მძღოლების ინტერესებს, ასევე ხაზის მფლობელ კომპანიებთან მერიის მიერ დადებულ კონტრაქტის პირობებს, რომლის მიხედვითაც, მგზავრობის საფასური არ უნდა გაიზარდოს.
"მოსახლეობას ახსოვს ხელისუფლების მიერ ხალხისთვის მიცემული პირობა, რომ მგზავრობის საფასური არ გაიზრდებოდა. ამდენად, შეუძლებელია ვენდოთ მერიის მიერ გაკეთებულ დაპირებას, რომ გაძვირება შეეხება მხოლოდ #4 სამარშრუტო ხაზს. "თავისუფალი საქართველო" მგზავრობის ძველი ღირებულების აღდგენას ითხოვს. წინააღმდეგ შემთხვევაში, ძღოლების გაფიცვის ახალი ტალღის ორგანიზებას დავიწყებთ", - აცხადებენ პარტიაში.
თბილისში #4 სამარშრუტო ტაქსით მგზავრობა დღეს 80 თეთრამდე გაძვირდა.
