შს მინისტრ ვანო მერაბიშვილთან ჟურნალისტების ჯგუფის შეხვერდა დასრულდა. როგორც ჯგუფის ერთ-ერთმა მონაწილემ, გაზეთ "რეზონანსის"მთავრმა რედაქტორმა ლაშა ტუღუშმა განაცხადა, მინისტრმა მათ მოთხოვნებზე კატეგორიული უარი განაცხადა. კერძოდ, მერაბიშვილმა უარი თქვა როგორც დაკავებული ფოტოგრაფების თავდებით გათავისუფლებაზე, ასევე სასამართლო პროცესამდე საქმეზე გრიფ "საიდუმლოს" მოხსნაზე.
"არაფერი ახალი მინისტრს ჩვენთვის არ უთქვამს, ის იმეორებდა იმავეს, რაც ჩვენთვის ისედაც უკვე ცნობილია. ერთადერთი სიახლე, რაც მერაბიშვილმა გვითხრა, არის ის, რომ სასამართლო პროცესი მალე გაიმართება, დაახლოებით ერთ თვეში და ის მთლიანად მხარს უჭერს პროკურატურის გადაწყვეტილებას, რომ სასამართლო იყოს ღია", - განაცხადა ტუღუშმა.
მისი თქმით, მათ ჰკითხეს მერაბიშვილს, როდის შეხვდება აღნიშნულ საქმესთან დაკავშირებით ქართველ ჟურნალისტებს, რაზედაც უპასუხა, რომ მსგავსი შეხედრა მედიასთან სასამართლოს გამართვის შემდეგ მოხდება. ტუღუშის თქმით, შეხვედრაზე, რომელიც 3 საათს მიმდინარეობდა, მერაბიშვილი ცდილობდა, დაერწმუნებინა იმაში, რომ დაკავებული ფოტოგრაფები ნამდვილად არიან უცხო ქვეყნის სპეცსამსახურებთან დაკავშირებული, თუმცა ამ ვერსიის დასაჯერებლად რამე დამატებითი არგუმენტი მინისტრს არ უთქვამს.
