" ჩვენ, რა თქმა უნდა, ვერ ავიღებთ სასამართლოს ფუნქციას, მაგრამ შექმნილ სიტუაციაში ცხადად იკვეთება, რომ ხელისუფლებამ ან სასწრაფოდ უნდა მოჰფინოს მეტი ნათელი ამ საქმეს, ან ბოდიში მოუხადოს საზოგადოებასაც და დაკავებულ ფოტორეპორტიორებსაც და გაათავისუფლოს ისინი უკანონო პატიმრობიდან", - ამ განცხადებას პოლიტიკური გაერთიანები „ახალი მემარჯვენეები" ავრცელებენ.
როგორც განცხადებაშია აღნიშნული, საქართველოში ჯაშუშობის ბრალდებით ფოტორეპორტიორების დაკავების ფაქტმა სერიოზული რეზონანსი შეიძინა არა მარტო ქვეყნის შიგნით, არამედ მის გარეთაც.
როგორც „მემარჯვენეები" მიიჩნევენ, ამ საქმის რეზონანსულობასთან შეფარდებით სრულიად არაადექვატური და არადამაჯერებელი აღმოჩნდა მათი ბრალეულობის დამადასტურებელი მასალები და არგუმენტები, რომლებიც ხელისუფლებამ წარმოადგინა.
„ამან, ბუნებრივია, საზოგადოებაში გააჩინა სრულიად სამართლიანი ეჭვი ფოტორეპორტიორების დევნის რეალურ მიზეზებთან დაკავშიებით და ასევე, სრულიად სამართლიანი პროტესტი უსამართლობის, მედიის თავისუფლების შეზღუდვის და ადამიანის უფლებების უხეშად შელახვის გამო. პოლიტიკური გაერთიანება „ახალი მემარჯვენეები" მოითხოვს სათანადო ორგანოებმა პატივი სცენ საზოგადოების კანონიერ უფლებას მიიღოს მეტი დამაჯერებელი ინფორმაცია მომეტებული ინტერესის მქონე საქმესთან დაკავშირებით და დაუყოვნებლივ წარმოადგინონ გიორგი აბდალაძის, ირაკლი გედენიძისა და ზურაბ ქურციკიძის ბრალეულობის დამადასტურებელი მასალები, თუკი ასეთი რამ საერთოდ გააჩნიათ. წინააღმდეგ შემთხვევაში სრული საფუძველი გვაქვს ვივარაუდოთ, რომ საქმე გვქვს ხელისუფლების კიდევ ერთ მცდელობასთან ჩაახშოს თავისუფალი აზრი ქვეყანაში და უხეში ფორმით ზეწოლა მოახდინოს მედიაზე", - აღნიშნულია განცხადებაში.
შეგახსენებთ, რომ ჯაშუშობის ბრალდებით შსს-ის კონტრდაზვერვის დეპარტამენტმა ფოტოკორესპონდენტები - ზურაბ ქურციკიძე, ირაკლი გედენიძე, ნათია გედენიძე და გიორგი აბდალაძე დააკავა. გედენიძეს, ქურციკიძესა და აბდალაძეს ბრალად ედებათ ერთ-ერთი უცხო ქვეყნის სპეცსამსახურის საფარქვეშ მოქმედი ორგანიზაციისთვის, საქართველოს ინტერესების საზიანოდ, მათი სამსახურებრივი მდგომარეობიდან გამომდინარე, სხვადასხვა სახის ინფორმაციის მიწოდება. მათ სასამართლომ წინასწარი დაპატიმრება შეუფარდა. ნათია გედენიძე კი ათათასლარიანი გირაოს სანაცვლოდ გათავისუფლდა. საქმეს გრიფი "საიდუმლო" დაედო.
