პარლამენტის პირველი ვიცე-სპიკერი მიხეილ მაჭავარიანი დარწმუნებულია, რომ ფოტორეპორტიორებთან დაკავშირებით შსს-ს სერიოზული მასალები აქვს. ამის შესახებ მიხეილ მაჭავარიანმა ჟურნალისტებს ფოტორეპორტიორებთან დაკავშირებით შსს-ის მიერ აქამდე გავრცელებულ მასალების შეფასებისას განუცხადეს.
"მხოლოდ ვიდეო- და სატელეფონო მასალიდან ნუ ამოდიხართ. ეს არის აისბერგის პატარა ნაწილი, გამოძიება ვერ გაჩვენებთ ყველაფერს იმას, რაც აქვს. ეს არც ოპერატიული თვალსაზრისითაა სწორი", - განაცხადა მაჭავარიანმა და დასძინა, რომ დაკავებულ ფოტორეპორტიორებს ჰქონდათ შეხება ქვეყნის უმაღლეს თანამდებობის პირთან და ჰქონდათ საშუალება აღებეჭდათ ფირზე.
მისი თქმით, დაკავებულ ფოტოგრაფებს ჰქონდათ ვალდებულებები, როგორც საჯარო მოხელეებს და თუ ისინი არ ასრულებდნენ ამ კანონს და გასცემდნენ ინფორმაციას, რისი ფაქტებიც არსებობს, სამართლადამცველებს კანონის ფარგლებში უნდა ემოქმედათ.
მაჭავარიანი დარწმუნებულია, რომ გამოძიებას აქვს ინფორმაცია, რომ ეს მასალები სხვა ქვეყნის სპეცსამსახურებში მოხვდა.
მაჭავარიანს სიმპტომატურად ეჩვენება ის გარემოებაც, რომ შსს-ის მიერ გავრცელებულ ინფორმაციას "უცხო ქვეყნის სპეცსამსახურზე", მალევე მოჰყვა რუსეთის საგარეო საქმეთა სამინისტროს რეაგირება.
