ბუნებრივი რესურსების სააგენტოში კადრები კონკურსის წესით შეირჩევა. როგორც დღეს ენერგეტიკისა და ბუნებრივი რესურსების მინისტრმა ალექსანდრე ხეთაგურმა განაცხადა, სააგენტოში კადრების აყვანა კონკურსის წესით მოხდება, თუმცა მანამდე მსურველები სპეციალურ გადამზადებას გაივლიან.
"როგორც მოგეხსენებათ ენერგეტიკისა და ბუნებრივი რესურსების სამინისტროში, ბუნებრივი რესურსების სააგენტოს რეფორმა გრძელდება. საუბარია ტყის რეფორმაზე, რათა მოსახლეობას ტყეში შესვლა გაუადვილოთ. სათანადო რეფორმები იყო ბუნებრივი რესურსების, მათ შორის თევზჭერის მიმართულებით. თუმცა ეხლა რეფორმის ახალ ეტაპს ვიწყებთ, რაც მთლაინად სააგენტოს სტრუქტურის თავიდან ჩამოყალიბებას გულისხმობს. მათ შორის მოხდება არსებული და ახალი კადრების გადამზადება. ჩვენ ვაცხადებთ კონკურს, სადაც ვაკანტურ თანამდებობაზე ახალი კადრების მოზიდვა მოხდება. ვისაც კონკურსში მონაწილეობის სურვილი აქვს ის წინასწარ გაივლის სპეციალურ მომზადებას შსს-ს აკადემიაში და შემდგომ კონკრეტული კურსის შემდეგ ჩაუტარდებათ სპეციალური ტესტირება და ამის შემდეგ დაიკავებენ კონკრეტულ თანამდებობებს", - განაცხადა ალექსანდრე ხეთაგურმა.
მინისტრის თქმით, კონკურსის წესით შეირჩევა, როგორც ტყის მცველი და მონიტორინგის სამსახურის სპეციალისტები, ასევე ყველა სამმართველოსა და განყოფილების უფროსები. ხეთაგურის თქმით, საწყის ეტაპზე გადამზადდება 100 ადამიანი, თუმცა ეს იქნება მუდმივი პროცესი და სართო ჯამში 400 ადამიანი გადამზადდება.