სამხედრო მოსამსახურეთა მიმართ ადმინისტრაციულ სამართალდარღვევათა ჩადენასთან დაკავშირებით პასუხისმგებლობის დაკისრებასთან დაკავშირებული მუხლი ახლებურად ყალიბდება. აღიშნულის შესახებ ნათქვამია "ადმინისტრაციულ სამართალდარღვევათა კოდექსის" განახლებულ ვარიანტში.
დღისთვის არსებული კანონის თანახმად, სამხედრო მოსამსახურეს და სამხედრო სარეზერვო სამსახურში გაწვეულ პირს, აგრეთვე შინაგან საქმეთა ორგანოების რიგითთა და უფროსთა შემადგენლობას, შესაბამისად, სამხედრო სამსახურის წესის დარღვევისთვის და ადმინისტრაციული სამართალდარღვევის ჩადენისთვის, პასუხისმგებლობა დაეკისრებათ დისციპლინურ წესდებათა მიხედვით.
ასევე საგზაო მოძრაობის, ნადირობის, თევზჭერისა და თევზის მარაგის დაცვისა და საქართველოს საგადასახადო კოდექსით დადგენილი, საქართველოს ეკონომიკურ საზღვარზე საქონლის გადაადგილებასთან დაკავშირებული წესების დარღვევისთვის, ნარკოტიკული საშუალების გასაღების მიზნის გარეშე, მცირე ოდენობით შეძენისთვის ან შენახვისთვის ან/და ნარკოტიკული საშუალების ექიმის დანიშნულების გარეშე მოხმარებისთვის დაეკისრებათ ადმინისტრაციული პასუხისმგებლობა საერთო საფუძველზე. აღნიშნულ პირებს არ შეიძლება შეეფარდოთ გამასწორებელი სამუშაო.
აღნიშნული მუხლი ძალაში 2011 წლის 1-ლი იანვრიდან შევიდა.
პარლამენტში ინიცირებული კანონპროექტის თანახმად კი, სამხედრო მოსამსახურეს და სარეზერვო სამსახურში გაწვეულ პირებს, საქართველოს შინაგან საქმეთა სამინისტროს მოსამსახურეებს, აგრეთვე სხვა პირებს, რომლებზედაც ვრცელდება დისციპლინურ წესდებათა ან დისციპლინის შესახებ სპეციალურ დებულებათა მოქმედება, ამ კოდექსით გათვალისწინებული სამართალდარღვევის ჩადენის შემთხვევაში, ადმინისტრაციული პასუხისმგებლობა დაეკისრებათ საერთო საფუძველზე, აგრეთვე დისციპლინური წესდების მიხედვით.
