მენეჯმენტ კომპანია „დექსუსმა" „ცენტრ პოინტის" უკვე მე-10 შეჩერებული პროექტი განაახლა. ამჯერად სამშენებლო სამუშაოები სამგორში, მოსკოვის პროსპექტზე მდებარე საცხოვრებელ და სავაჭრო კომპლექს „თეთრ სახლზე" განახლდა. სამუშაოების დაწყებას დღეს „დექსუსის" დამფუძნებლებთან ერთად ის მომხმარებლებიც დაესწრნენ, რომლებიც კუთვნილი ფართების მიღებას რამდენიმე წელია ელოდებიან.
დღესვე „დექსუსმა" კომპლექსის მშენებლობის დასრულების კონკრეტული თარიღიც დაასახელა: „თეთრი სახლი" 2012 წლის 28 მარტს უნდა დამთავრდეს. პროექტის დასრულების შემდეგ კომერციულ და საცხოვრებელ ფართებს 200-მდე მომხმარებელი მიიღებს. „თეთრი სახლის" მშენებლობაში „დექსუსი" 2,5 მილიონი ლარის ინვესტიციას განახორციელებს.
„დექსუსის" დირექტორის გიორგი ქანანაშვილის განცხადებით, „ცენტრ პოინტის" შეჩერებული პროექტების განახლება აქტიურად გაგრძელდება და მომხმარებლები ბინებს წინასწარ დათქმულ ვადებში აუცილებლად მიიღებენ: „სამშენებლო სამუშაოებს უკვე მე-10 პროექტზე ვანახლებთ, რაც ჩვენი კომპანიისთვის და მომხმარებლებისთვის საკმაოდ მნიშვნელოვანი შედეგია. „თეთრი სახლი" ერთ-ერთი მასშტაბური პროექტია და მისი დასრულების შემდეგ კუთვნილ ფართს 200-მდე მომხმარებელი მიიღებს. დღესვე ტრადიციულად გამოვაცხადეთ ამ პროექტის დასრულების თარიღიც-2012 წლის 28 მარტი და ისევე, როგორც სხვა დასრულებულ პროექტებს, „თეთრ სახლსაც" დათქმულ ვადაში აუცილებლად გავხსნით",-აცხადებს გიორგი ქანანაშვილი.
„თეთრი სახლი" მე-10 პროექტია, რომელზეც მუშაობა „დექსუსმა" ცენტრ-პოინტის მართვაში აღების შემდეგ დაიწყო. მათგან 5 პროექტი კომპანიამ უკვე დაასრულა და ფართები 625 მომხმარებელს გადასცა. „თეთრი სახლის" გარდა, მუშაობა ამჟამად 4 პროექტზე მიმდინარეობს, რომლებიც ამ წლის შემოდგომაზე დასრულდება. პარალელურად, ივლისში „დექსუსი" სამშენებლო სამუშაოებს დამატებით 2 ობიექტზე - სააკაძის მოედნის კომპლექსსა და ხოშარაულის ქუჩაზე მდებარე მეოთხე კორპუსში, ე.წ „ხერხზე" განაახლებს.
"დექსუსმა" სამშენებლო ბაზრის ყველაზე მსხვილი, „ცენტრ პოინტის" ქოლგის ქვეშ გაერთიანებულ კომპანიათა ჯგუფის 100%-ანი წილი მართვაში 2010 წლის სექტემბერში აიღო. „დექსუსის" მართვაში შესვლამდე პროექტებში სამშენებლო სამუშაოები პრაქტიკულად შეჩერებული იყო. კომპანიის მიერ შემუშავდა „ცენტრ პოინტის" რეაბილიტაციის გეგმა. გეგმის მიხედვით, 2013 წლის ბოლომდე „ცენტრ პოინტის" ყველა მომხმარებელი უნდა დაკმაყოფილდეს.