"ავიაკომპანია "აირზენა" არ იყიდება", - ასე პასუხობს "აირზენა" სომხური ავიაკომპანიის „არმავია" ხელმძღვანელის მიხაილ ბაღდასაროვის განცხადებას, რომელმაც გუშინ განაცხადა, რომ ქართული მხარიდან "აირზენას" შესყიდვის თაობაზე შეთავაზება მიიღო.
"აირზენას" წარმომადგენელი ნინო გიორგობიანი "ჯი-ეიჩ-ენთან" საუბარში აცხადებს, რომ "არმავიასა" და "აირზენას" შორის ქართული ავიაკომპანიის გასხვისებაზე საუბარი არ ყოფილა, რადგანაც "აირზენა" არ იყიდება.
გიორგობიანი აცხადებს, რომ ერთი კვირის წინ "არმავიასა" და "აირზენას" შორის საუბარი შედგა, სადაც ორ კომპანიას შორის ურთიერთთანამშრომლობის საკითხები განიხილებოდა.
"გუშინ გავრცელდა ინფორმაცია, რომ თითქოს ავიაკომპანია "აირზენა" იყიდება და მისი ყიდვის სურვილი აქვს ავიაკომპანია "არმავიას".
კატეგორიულად მინდა განვაცხადო, რომ ინფორმაცია სინამდვილეს არ შეესაბამება და "აირზენას" გაყიდვის საკითხი დღის წესრიგში არ იდგა და არც დგას. "არმავიასა" და "აირზენას" შორის საუბარი იყო ურთიერთთანამშრომლობის საკითხებზე, ისიც ერთი კვირის წინ. საუბრის თემა კი იყო თბილისში ფრენების განახლება. თუმცა დღემდე მათგან განაცხადი რეისების შესრულებასთან დაკავშირებით არ მოსულა. და თუ "არმავიას" პრეზიდენტს უნდა რამის ყიდვა, მას შეიძლება მთვარის ყიდვაც უნდოდეს, სურვილი შესაძლოა ყოველთვის გამოითქვას", - განაცხადა სააგენტო "ჯი-ეიჩ-ენთან" საუბრისას "აირზენას" წარმომადგენელმა ნინო გიორგობიანმა.
შეგახსენებთ, რომ გუშინ 6 ივლისს სომხური ავიაკომპანიის „არმავიას" ხელმძღვანელმა მიხაილ ბაღდასაროვიმ განაცხადა, რომ "აირზენასგან" შესყიდვის თაობაზე შეთავაზება მიიღო. პრესკონფერენციაზე ბაღდასაროვიმ აღნიშნა, რომ ეს წინადადება მათი მხრიდან შესაძლოა განხილვის საგანი გახდეს.