„საქართველოს მხრიდან საჩქაროდ ინიციატივის გამოჩენა სირთულეებს შეუქმნის ისედაც რთულ ურთიერთობაში სომხურ საპატრიარქოსთან", - ასე აფასებს ექსპერტი რამაზ საყვარელიძე საქართველოში მოქმედი რელიგიებისთვის საჯარო სამართლის იურიდიული პირის სტატუსის შესახებ პარლამენტის მიერ მიღებულ კანონს. როგორც მან „ჯი-ეიჩ-ენს" განუცხადა, საქართველოს საპატრიარქოს აქვს თავისი პოზიციები, რომელზედაც ანგარიშის გაწევა ქვეყნის ინტერესებშია.
„კანონის მიღებას შევაფასებდი დადებითად, იმ შემთხვევაში, რომ პარლამენტს კანონი არ მიეღო, ფაქტობრივად, რაიმე კონსულტაციის გარეშე. საკანონმდებლო ორგანომ ანგარიში არ გაუწია არაფერს. საპატრიარქოს აქვს თავისი პოზიცია ამ საკითხთან მიმართებაში. ეს პოზიციები გამოწვეულია იმით, რომ საპატრიარქოს სხვადასხვა ეკლესიებთან ურთიერთობაში თავისი პირობები აქვს. ამიტომ, საპატრიარქოს ჩაყენება მინიმუმ გაუგებარ მდგომარეობაში საერთოდ გაუმართლებელია. კიდევ ვიმეორებ, რომ საპატრიარქოს აქვს თავისი პოზიციები, რომელზედაც ანგარიშის გაწევა და აპელირება ქვეყნის ინტერესებშია. მაგალითად, საპატრიარქომ გამოუცხადა სომხეთის პატრიარქს, რომ ყველა პროცესი წავა პროპორციულად. ანუ, რასაც გააკეთებს ერთი მხარე, იგივეს გააკეთებს მეორე მხარე და ა.შ. ასე, რომ საქართველოს მხრიდან საჩქაროდ ინიციატივის გამოჩენა სირთულეებს შეუქმნის ისედაც რთულ ურთიერთობაში სომხურ საპატრიარქოსთან. რა საჭირო იყო ეს გაუგებარია. სომხეთს კი არ უჩანს იმის პირი, რომ მსგავსი გადაწყვეტილება მიიღოს. დრო პატრიარქმა იმიტომ მოითხოვა, რომ გაეაქტიურებინა სომხური მხარე ამ საკითხთან მიმართებაში", - განუცხადა „ჯი-ეიჩ-ენს" რამაზ საყვარელიძემ.
მისივე თქმით, სამწუხაროდ, ამ კანონის მიღება და გარეგინ მეორის ჩამოსვლა ერთმანეთს ემთხვევა.
„მე თავშიც ვახსენე. რომ ვემხრობი ამ კანონის მიღებას, რადგან რელიგიური უმცირესობების საკითხი მოუგვარებელია. მაგრამ, ცუდად მოგვარებული საკითხი არ ნიშნავს, რომ უკეთეს მდგომარეობას მივიღებთ. საჭირო იყო კარგად გააზრებული პროცესი, რომლის შედეგიც იქნებოდა შეთანხმებული და კონსესუსიანი გადაწყვეტილება", - აღნიშნა საყვარელიძემ.
.
