„ქართული პარტიის" პოლიტიკური მდივნის ეროსი კიწმარიშვილის განცხადებით, სამართალდამცავებმა ირაკლი ოქრუაშვილის ბიძის, ზურაბ გიგუაშვილის მეუღლეს მისი ქმრის ბრალეულობის საბუთი გააცნეს.
ეს ინფორმაცია ჟურნალისტებს „ქართული პარტიის" პოლიტიკურმა მდივანმა ეროსი კიწმარიშვილმა 5 ივლისს გამართულ პრესკონფერენციაზე მიაწოდა.
მისივე თქმით, „ქართული პარტიის" ცენტრალურ ოფისზე დაწესებულია ზედამხედველობა და მიმდინარეობს არა ფარული, არამედ ღია და გამომწვევი თვალთვალი.
„დღეს სოზარ სუბარს, როდესაც ის ერთ-ერთ ტელე-ეთერში მიდიოდა, ოფისიდან ორი „პიკაპით" აედევნენ. ასეთი ქმედებებით, ხელისუფლება ცდილობს ორკვირიანი დაჭერებისა და ტერორის შემდეგ, დამატებით, ნერვოზული ფონი შექმნას და ხელი შეუშალოს „ქართული პარტიის" საქმიანობას", - განაცხადა ეროსი კიწმარიშვილმა.
