„ქართული პარტიის" თავმჯდომარის სოზარ სუბარის თქმით, 4 ივლისს „ქართული პარტიის" ოფისის დასარბევად და ზურაბ გიგუაშვილის დასაკავებლად უფრო მეტი სპეცრაზმელი იყო მობილიზებული, ვიდრე ბინ ლადენის ლიკვიდაციის ოპერაციის დროს.
„ზურაბ გიგუაშვილის ერთადერთი „დანაშაული"ის არის, რომ ირაკლი ოქრუაშვილის ბიძაა. დღეს საქართველოში ადამიანებს უკვე ამისთვისაც კი სჯიან", - აღნიშნა სოზარ სუბარმა. მისი თქმით, ზურაბ გიგუაშვილი, ამ თვალსაზრისით, ერთადერთი გამონაკლისი არ არის. „ქართული პარტიის" თავმჯდომარე საზოგადოებას შეახსენებს ნორა კვიციანის ისტორიას, რომელიც უკვე მეხუთე წელია ციხეში ზის იმის გამო, რომ ხელისუფლება მის ძმას და შვილს დევნის. სოზარ სუბარი ამავე კონტექსტში ახსენებს მამა-შვილ ლიჩელებსაც, რომლებიც ხელისუფლებამ მხოლოდ იმის გამო დააპატიმრა, რომ მათი ოჯახის წევრი, გოჩა ლიჩელი, თავის დროზე, ირაკლი ოქრუაშვილის პირად დაცვაში იყო, ახლა კი „ქართული პარტიის" ოფისის დაცვაში მუშაობს.
„ეს არის დღევანდელი ხელისუფლების მართვის სტილი, რომელიც ადამიანების დაშინებას ისახავს მიზნად. „ქართული პარტია" ყოველივე ამას სიმართლეს, სიმტკიცეს და ბრძოლის ჟინს დაუპირისპირებს", - დასძინა „ქართული პარტიის" თავმჯდომარემ .
