საქართველოს საგარეო საქმეთა სამინისტროს ინფორმაციით, ლარსის გამშვებ პუნქტზე გამარტივებული რეჟიმის შემოღების საკითხი თავის დროზე რუსულ მხარესთანაც იყო შეთანხმებული. ამის შესახებ დღეს, საგარეო საქმეთა მინისტრის მოადგილემ ნინო კალანდაძემ ტრადიციულ ბრიფინგზე განაცხადა.
"ლარსის სასაზღვრო-გამშვები პუნქტის თაობაზე ერთობლივი გადაწყვეტილება იყო მიღებული და რუსულ მხარესთან ნოტების გაცვლაც მოხდა. მაშინ ჩვენ შევთანხმდით, რომ ორივე მხარე სწორედ იმ რეჟიმში აამოქმედებდა ამ ცვლილებას, რის ტექნიკური შესაძლებლობაც აქვს.", - აღნიშნა კალანდაძემ.
მისი ინფორმაციით, რუსულმა მხარემ შეთანხმების დროს აღნიშნა, რომ მათ ამ ეტაპზე ვიზების ადგილზე გაცემისთვის ტექნიკური რესურსი არ გააჩნიათ.
"ქართული მხარე ამის რესურსი აქვს და ამიტომ არ ვთვლით, რომ ამ მხრივ, რომელიმე მხრიდან მის განხორციელებაზე წინააღმდეგობა უნდა არსებობდეს. ჩვენი მთავარი ამოცანა და მოტივაცია იყო ამ შემთხვევაში არა პარიტეტის დაცვა, არამედ ყველაფერი გაგვეკეთებინა იმისთვის, რომ გამარტივებულიყო სავიზო რეჟიმის წესი როგორც ტექნიკურად, ასევე ფინანსური კუთხითაც", - აღნიშნა მან.
შეგახსენებთ, რომ 2 ივლისიდან ლარსის საბაჟო პუნქტის გადმოკვეთის დროს საქართველოში შემომსველ პირებს ვიზების აღება გამშვებ პუნქტზე შეუძლიათ.
