საქართველოს სახალხო დამცველი გიორგი ტუღუში სასჯელაღსრულების, პრობაციისა და იურიდიული საკითხების მინისტრ ხათუნა კალმახელიძეს მიმართავს.
",,საქართველოს სახალხო დამცველის შესახებ" საქართველოს ორგანული კანონის 21-ე მუხლის ,,ბ" ქვეპუნქტის თანახმად, საქართველოს სახალხო დამცველმა გიორგი ტუღუშმა რეკომენდაციით მიმართა საქართველოს სასჯელაღსრულების, პრობაციისა და იურიდიული დახმარების საკითხთა მინისტრს ხათუნა კალმახელიძეს, დაუყოვნებლივ უზრუნველყოს პატიმრების დ.მ.-ს და ბ.ა.-ს გადაყვანა ნორმალურ საყოფაცხოვრებო პირობებში და დაავალოს შესაბამის სამსახურს მათთვის ადეკვატური სამედიცინო მომსახურების გაწევის უზრუნველყოფა", - აღნიშნულია სახალხო დამცველის მიმართვაში.
მიმართვის თანახმად, 2011 წლის 16 ივნისს, ქუთაისის N2 სასჯელაღსრულების დაწესებულების სამორიგეო ნაწილში, სადაც განთავსებულია სასამართლოზე გამსვლელ პირთა დროებით მოსათავსებელი ოთახები - ე.წ. „ბოქსები", სახალხო დამცველის რწმუნებული შეხვდა მსჯავრდებულებს დ. მ.-ს და ბ. ა.-ს, რომლებიც შესახლებულნი იყვნენ 2 დროებით მოსათავსებელ ოთახში. საუბრისას მსჯავრდებულებმა აღნიშნეს, რომ ე.წ. „ბოქსში" ხანგრძლივი დროის განმავლობაში იმყოფებიან.
"აღსანიშნავია, რომ ამ საკნების ფართობი არის დაახლოებით 1.5 კვ.მ. და იქ მხოლოდ ერთი გრძელი ხის სკამი დგას. ვიზიტის დროს ორივე საკანში იდგა მძიმე სუნი, იყო ანტისანიტარია, მსჯავრდებულების საკვები პირდაპირ იატაკზე იდო, იქვე ეყარა მათი ტანსაცმელი. საკანში არ არის წყალი, სარკმელი, განათება, მსჯავრდებულებს აქვთ მხოლოდ გადასაფარებელი, არ აქვთ საწოლი, რის გამოც მათ ხის გრძელ სკამზე ან ბეტონის იატაკზე უწევთ ძილი, მათ არ აქვთ ჰიგიენის საშუალებები. სახალხო დამცველის რწმუნებულთა საუბრისას სამორიგეო ნაწილის თანამშრომლებმა დაადასტურეს დ. მ.-ს და ბ. ა.-ს ე.წ. „ბოქსებში" ხანგრძლივი დროის განმავლობაში ყოფნის ფაქტი. სახალხო დამცველის რწმუნებულები გაეცნენ მსჯავრდებულთა სამედიცინო დოკუმენტაციას, რომლის თანახმად დ. მ.-ს, 2011 წლის 6 აპრილს, ექიმ ფსიქიატრის ბოლო კონსულტაციის შედეგად დაესვა დიაგნოზი: ალკოჰოლიზაციის შემდგომი პიროვნული და ქცევითი აშლილობა. რეკომენდაციად განესაზღვრა: დინამიური ფსიქიატრიული და ნარკოლოგიური დაკვირვება. 2011 წლის 17 მარტს, ბ. ა.-ს ექიმ ფსიქიატრის კონსულტაციის შედეგად დაესვა დიაგნოზი: პიროვნების ფსიქოპათიური განვითარება, ალკოჰოლიზაცია და ნარკოტიზაცია ანამნეზით. მას ასევე განესაზღვრა დინამიური ფსიქიატრიული დაკვირვება. მსჯავრდებულთა პირადი საქმეების მიხედვით, დ.მ.-ს სასჯელაღსრულების დეპარტამენტის თავმჯდომარის 2010 წლის 1 ოქტომბრის ბრძანებით განსაზღვრული აქვს ნახევრად ღია ტიპის დაწესებულებაში სასჯელის მოხდა. მიუხედავად ამისა, 2009 წლის 24 დეკემბრიდან ის განთავსებულია ქუთაისის N2 დაწესებულებაში, ხოლო ბ. ა. ქუთაისის N2 დაწესებულებაში ეტაპირებულია 2011 წლის 25 თებერვალს ქუტირის ფსიქიატრიული დაწესებულებიდან, სადაც ის 2006 წლიდან იყო განთავსებული. დაწესებულების ექიმ-ფსიქიატრის რეკომენდაციის მიუხედავად, 3-4 თვის განმავლობაში პატიმრებს რაიმე სახის კონსულტაცია არ ჩატარებიათ. მთავარი ექიმი ზეპირსიტყვიერად განმარტავს, რომ ბ.ა. და დ.მ., საჭიროების შემთხვევაში, ექიმ-ფსიქიატრის კონსულტაციით უზრუნველყოფილნი არიან, მაგრამ ეს არ დასტურდება მსჯავრდებულების სამედიცინო ბარათების და დაწესებულებაში წარმოებული ჟურნალებით", - აღნიშნულია მიმართვაში.
მიმართვის თანახმად, სახალხო დამცველს მიაჩნია, რომ არათუ ჯანმრთელობის პრობლემის მქონე, არამედ სრულიად ჯანსაღი პატიმრისთვისაც არაადამიანურ მოპყრობად შეიძლება შეფასდეს ქუთაისის N2 დაწესებულების ე.წ. „ბოქსებში" განთავსება.
"ყოველივე ამას ემატება ის გარემოებაც, რომ ორივე მსჯავრდებულს აშკარად გამოხატული აქვთ ჯანმრთელობის პრობლემები, რაც კიდევ უფრო ამძიმებს მათ მდგომარეობას", - აღნიშნულია მიმართვაში.
