ოს სეპარატისტთა ლიდერი ედუარდ კოკოითი აცხადებს, რომ ე.წ. სამხრეთ ოსეთში ე.წ. საპრეზიდენტო არჩევნებამდე რეზონანსული დანაშაულებია მოსალოდნელი. ეს განცხადება ოს სეპარატისტთა ლიდერმა ცხინვალში გამართულ თათბირზე გააკეთა. ინფორმაციას ამის შესახებ ე.წ. სამხრეთ ოსეთის ბეჭდვისა და ინფორმაციის კომიტეტი ავრცელებს.
კოკოითის განცხადებით "მიუხედავად იმისა, რომ სიტუაცია ე.წ. სამხრეთ ოსეთში სტაბილურია, არსებობს ინფორმაცია იმის შესახებ, რომ არის მცდელობა გარე ძალებისგან, მისი დესტაბილიზება მოხდეს.
"ჩვენთან შესაძლოა რეზონანდული დანაშაულები მოხდეს. რესპუბლიკის ძალოვანმა სტრუქტურებმა ყველა ზომას უნდა მიმართონ იმისათვის, რომ აღნიშნული მიმართულებით მუშაობა გააძლიერონ", _ განაცხადა კოკოითიმ და აღნიშნა, რომ განსაკუთრებული ყურადღება ე.წ. სამხრეთ ოსეთის სტუმრებს უნდა დაეთმოთ. კოკოითის აზრით, შესაძლოა პროვოკაციები სწორედ მათ წინააღმდეგ იყოს განხორციელებული.
"ჩვენს მტრებს მეტი არავითარი არგუმენტი არ აქვთ, ვინაიდან სამხრეთ ოსეთში სიმშვიდეა და მათ შეუძლიათ, ნებისმიერი გზით ეცადონ სიტუაციის დესტაბილიზებას და ამით რესპუბლიკის დისკრედიტაციას. სხვა ამოცანა მათ არ აქვთ", _ განაცხადა ოს სეპარატისტთა ლიდერმა.
შეგახსენებთ, რომ რუსეთის ფედერაციის მიერ ოკუპირებულ ცხინვალის რეგიონში ე.წ. საპრეზიდენტო არჩევნები მიმდინარე წლის ნოემბერში უნდა ჩატარდეს.
