იძულებითი აუქციონის ჩატარების დროს ფასის მატების ბიჯი ქონების საწყისი ფასის 2%-ით განისაზღვრა. აღნიშნულთან დაკავშირებით საქართველოს იუსტიციის მინისტრის ბრძანება "იძულებითი აუქციონის ჩატარების ფორმების, წესისა და პროცედურების დამტკიცების შესახებ" უკვე ძალაში შევიდა.
დღემდე არსებული ნორმის თანახმად, ინტერნეტაუქციონის დროს ფასის მატება ხდებოდა ვაჭრობის ბიჯით, რაც ჩანს ონლაინრეჟიმში, ფასის მატების ბიჯი შეადგენს ქონების საწყისი ფასის 1%-ს, ხოლო ახალი ბრძანების თანახმად, ფასის მატების ბიჯი პირველ აუქციონზე ქონების საწყისი ფასის 2%-ით განისაზღვრება.
ცვლილების თანახმად, თუ პირველ აუქციონზე არ მოხდა ქონების რეალიზაცია, აღსრულების ეროვნული ბიურო პირველი აუქციონის დასრულებისთანავე აცხადებს პირველ განმეორებით აუქციონს. პირველი განმეორებითი აუქციონი ცხადდება იმავე ფორმით, რა ფორმითაც გამოცხადდა პირველი აუქციონი. პირველ განმეორებით აუქციონზე ქონების საწყისი ფასი შეადგენს პირველ აუქციონზე გამოცხადებული საწყისი ფასის ნახევარს.
მანამდე კი, იმ შემთხვევაში, თუ პირველ აუქციონზე არ მოხდება ქონების რეალიზაცია, აღსრულების ეროვნული ბიურო პირველი აუქციონის დასრულებიდან 7 დღის ვადაში აცხადებს განმეორებით აუქციონს.
თუ ქონების რეალიზაცია არც პირველ განმეორებით აუქციონზე მოხდება, აღსრულების ეროვნული ბიურო პირველი განმეორებითი აუქციონის დასრულებისთანავე აცხადებს მეორე განმეორებით აუქციონს, ხოლო ქონების საწყისი ფასი შეადგენს ნულ ლარს, მაგრამ თუ ქონების რეალიზაცია ისევ ვერ მოხერხდა, ქონება თავისუფლდება იძულებითი რეალიზაციის განმახორციელებელი კრედიტორის სასარგებლოდ დადებული ყადაღისგან. აღნიშნულ ქონებაზე იმავე მოთხოვნასთან დაკავშირებით იმავე კრედიტორის სასარგებლოდ სააღსრულებო წარმოება აღარ განხორციელდება. აღნიშნული ქონება უბრუნდება მოვალეს, გარდა შემთხვევისა, როდესაც აღნიშნულ ქონებაზე აღსრულებას გააგრძელებს ის აღმასრულებელი, რომლის ყადაღაც მომდევნო რიგშია რეგისტრირებული.
