"გუდვილმა" ბაზარზე ახალი პროდუქტი, ინტერნეტ-სუპარმარკეტი - GoodwillDelivery.ge გამოიტანა.
დღეიდან, ჰიპერმარკეტ "გუდვილის" მომხმარებლებს საშუალება ექნებათ სახლიდან გაუსვლელად, ინტერნეტით შეუკვეთონ "გუდვილის" ნებისმიერი სახის პროდუქცია. პროდუქტების მისამართზე მიტანას მსოფლიოში ლიდერი ბრენდი DHL-ი, ხოლო ინტერნეტით გადახდებს "თი-ბი-სი" ბანკი უზრუნველყოფს.
ინტერნეტ-სუპარმარკეტის პირველი მომხმარებელი ეკონომიკისა და მდგრადი განვითარების მინისტრი ვერა ქობალია იყო, რომელმაც 41,65 ლარის პროდუქცია შეიძინა. მინისტრმა არჩევანი ძირითადად ქართული წარმოების პროდუქციაზე შეაჩერა. მინისტრმა 2 პური, 2 "სანტისიმოს" ხაჭო, "კულას" წვენები და "სიფის" გელი შეიძინა.
ვერა ქობალიამ აღნიშნა, რომ ანალოგიური სერვისით საზღვარგარეთ ცხოვრებისას აქტიურად სარგებლობდა და საქართველოშიც იგივე სერვისი მისთვის მისაღებია, რადგანაც ამით გარკვეულწილად დროის დაზოგვაც ხდება.
"ასეთ სერვისზე საქართველოში ძალიან დიდი მოთხოვნაა. "გუდვილმა" ამ მიმართულ;ებით მნიშვნელოვანი ნაბიჯი გადადგა. საზღვარგარეთ ცხოვრებისას მე ხშირად ვსარგებლობდი ანალოგიური სერვისით, რადგანაც ჩემი სამსახურის გამო დრო ნაკლები მრჩებოდა. კარგია, რომ ანალოგიური სერვისი საკუთარ მომხმარებელს "გუდვილმაც" შესთავაზა"- განაცხადა ეკონომიკისა და მდგრადი განვითარების მინისტრმა ვერა ქობალიამ.
"გუდვილის" ინფორმაციით, "ინტერნეტ-სუპერმარკეტზე" მუშაობა 2010 წლის დეკემბერში დავიწყეთ, შვიდი თვის განმავლობაში პროექტის განხორციელებაზე მარკეტინგის გუნდი აქტიურად მუშაობდა, პროექტისთვის ჰიპერმარკეტში შეიქმნა სერვის ცენტრი, დამატებით დასაქმდა 7 ადამიანი.
ინტერნეტ სუპერმარკეტი ინოვაციური სერვისია. ვფიქრობ მათ ვისაც სურს იყვნენ ჩვენი მომხამრებლები, მაგრამ შორი მანძილისა და დამატებითი ხარჯების გამო ვერ ახერხებენ "გუდვილში" სიარულს, კარგი საშუალება ეძლევათ ისარგებლონ მარალი ხარისხის მომსახურებით. გადაზიდვის დაბალი ტარიფი, ჰიპერმარკეტთან შედარებით 5%-ით დაბალი ფასი, ასევე ონლაინ რეჟიმში ბონუს ქულების დაგროვების შესაძლებლობა და არაერთი მარკეტინგული სტიმულები, რომელიც დაგეგმილია, მოიზიდავს ახალ სამომხმარებლო სეგმენტსა და ზოგადად ქვეყანში ინტერნეტ შოპინგის კულტურას შექმნის და განავითარებს.
თავდაპირველად GoodwillDelivery.ge -ზე წარმოდგენილი იქნება პირველადი მომხმარების 1500-მდე პროდუქტი, რაც მუდმივად განახლდება და შეივსება. წლის ბოლოსთვის პროდუქტების რაოდენობა 5000-ს მიაღწევს.
მსოფლიო ტენდენციებზე დაყრდნობით შეგვიძლია თამამად განვაცხადოთ, რომ მალე ონლაინ ვაჭრობა საქართველოშიც მოიპოვებს ნდობას. მომხმარებელი შეეჩვევა ამ ტექნოლოგიას და ისიამოვნებს ინოვაციური, მოსახერხებელი სერვისით - განაცხადა კომპანია "გუდვილის" გენერალურმა დირექტორმა ნუგზარ მარღულიამ.
ჩატარებული კვლევები ცხადყოფს, რომ საქართველოში მომხმარებლები სულ უფრო ხშირად იყენებენ ონლაინ შოპინგს. ამასთან მსოფლიოში იზრდება მოთხოვნა ონლაინ სუპერმარკეტებზე. ბოლო ერთი წლის მანძილზე მსოფლიოს წამყვან ონლაინ-სუპერმარკეტებში მომხმარებელთა რაოდენობა საშუალოდ 19%-ით გაიზარდა, რეალიზაციის მაჩვენებელი თითქმის გაორმაგდა და მთლიანი სამომხმარებლო ბაზის 2 პროცენტი შეადგინა.