მთავარ პროკურატურაში მოწმისა და დაზარალებულის კოორდინატორთა ტრეინინგი მიმდინარეობს. ღია კონკურსის წესით შერჩეულ 16 კანდიდატს სწავლებას პრაქტიკოსი იურისტები და ფსიქოლოგები უტარებენ.
მოწმისა და დაზარალებულის კოორდინატორის კონკურის გამარჯვებულები ერთი თვის განმავლობაში ინტენსიურ ტრეინინგებს გაივლიან. სწავლების პროცესში ყურადღება გამახვილდება როგორც თეორიულ საკითხებზე, ისე - პრაქტიკული უნარ-ჩვევების გამომუშავებაზე. სემინარების მონაწილეები შეისწავლიან სისხლის სამართლის პროცესს, მოწმისა და დაზარალებულის უფლება-მოვალეობებს, გაეცნობიან მათთან ეფექტური კომუნიკაციის დამყარებისათვის საჭირო ფსიქოლოგიურ ტექნოლოგიებს _ სტრესის მართვას, ეფექტურ კომუნიკაციას და ა.შ.
მთავარი პროკურატურის ახალი პროგრამის - მოწმისა და დაზარალებულის კოორდინატორის მიზანი სისხლის სამართლის საქმის მსვლელობისას მოწმეებისა და დაზარალებულებისადმი სამართლიანი და ღირსეული მოპყრობის უზრუნველყოფა და მათთვის საქმის მსვლელობასთან დაკავშირებით დეტალური ინფორმაციის მიწოდებაა, რაც მოქალაქეების ურთიერთობას სამართალდამცავ სისტემასთან უფრო ეფექტურს გახდის.
პროგრამა 2011 წლის სექტემბრიდან ამოქმედდება. პირველ ეტაპზე ის თბილისში, რუსთავში, ქუთაისსა და ბათუმში განხორციელდება, მოგვიანებით კი მისი არეალი გაფართოვდება და მთელ საქართველოს მოიცავს.