საქართველოს სტატისტიკის ეროვნული სამსახურის ინფორმაციით, საქართველოს მოსახლეობის რიცხოვნობა გაიზარდა. "საქსტატში" აცხადებენ, როიმ 2011 წლის 1 იანვრის მდგომარეობით საქართველოს მოსახლეობის რიცხოვნობამ 4469,2 ათასი კაცი შეადგინა1 , რაც 2010 წლის შესაბამისი პერიოდის მაჩვენებელთან შედარებით 32,8 ათასი კაცით, ანუ 0.7 პროცენტით მეტია. ამასთან, ქვეყნის მოსახლეობის 53.1 პროცენტი (2371,3 ათასი კაცი) - ქალაქად, ხოლო 46.9 პროცენტი (2097,9 ათასი კაცი) სოფლად ცხოვრობს მოსახლეობის 47.6 პროცენტი მამაკაცია, ხოლო 52.4 პროცენტი - ქალი.
სტატისტიკის ეროვნული სამსახურის ინფორმაციით, მოსახლეობის რიცხოვნობის ზრდამ შესაბამისი ასახვა ჰპოვა ქვეყნის რეგიონებში. მოსახლეობის ყველაზე დიდი მატება 2010 წლის 1 იანვართან შედარებით აღინიშნება ქვემო ქართლის რეგიონში - 1.2 პროცენტი, აჭარის ა.რ. - 1.0 პროცენტი, ქ. თბილისში - 0.9 პროცენტი და შიდა ქართლის რეგიონში - 0.8 პროცენტი. მოსახლეობის შემცირება (-0.6%) აღინიშნება რაჭა-ლეჩხუმისა და ქვემო სვანეთის რეგიონში (იხ. ცხრილი #2), რაც გამოწვეულია აღნიშნულ რეგიონში 2010 წელს დაფიქსირებული უარყოფითი ბუნებრივი მატებით (-426 ერთეული).
2010 წლის 1 იანვრის მდგომარეობასთან შედარებით 0.4 პროცენტული პუნქტით გაიზარდა 0-4 წლის მოსახლეობის წილი მთლიან მოსახლეობაში და 275,4 ათასი კაცი შეადგინა 2007 წლიდან 0-4 წლის ასაკის მოსახლეობის პროცენტული წილი მატულობს, რაც გამოწვეულია ცოცხლად დაბადებულთა რიცხოვნობის მკვეთრი ზრდით. აქვე უნდა აღინიშნოს ის ფაქტიც, რომ 2011 წლის 1 იანვრის მდგომარეობით 65 წლის და უფროსი ასაკის მოსახლეობის პროცენტული შემადგენლობა მთლიან მოსახლეობაში წინა წელთან შედარებით უმნიშვნელოდ, მაგრამ მაინც შემცირდა (14.0%-დან 13.8%-მდე).
მოსახლეობის რაოდენობის ყოველწლიური მაჩვენებლის გაიანგარიშებაში მნიშვნელოვანია მოსახლეობის ბუნებრივი მატების მონაცემები (განსხვავება შობადობასა და გარდაცვალებას შორის). 2010 წელს საქართველოში დაფიქსირდა მოსახლეობის 15-ათასიანი ბუნებრივი მატება. საქართველოს სტატისტიკის ეროვნული სამსახური ქვეყანაში მიგრაციული სალდოს შესაფასებლად იყენებს საქართველოს შინაგან საქმეთა სამინისტროს მონაცემებს სახელმწიფო საზღვრის გადამკვეთთა შესახებ, სადაც ასახულია ქვეყანაში წლის განმავლობაში შემოსულთა და გასულთა რიცხოვნობა მოქალაქეობის მიხედვით. 2010 წელს, წინა წლის მსგავსად, ქვეყანაში დადებითი მიგრაციული ტენდენცია შეინიშნება: 2009 წელს მიგრაციულმა სალდომ 34,2 ათასი, ხოლო 2010 წელს 18,1 ათასი კაცი შეადგინა