ოპოზიციური „ექვსეული" სამოქალაქო სექტორს სხვადასხვა მიმართულებით ერთობლივი სამუშაო ჯგუფების შექმნას სთავაზობს.
წინადადებები დღეს, „თბილისი მარიოტში", „ექვსეულის" ლიდერებსა და საზოგადოების წარმომადგენლებს შორის გამართულ შეხვედრაზე გაჟღერდა.
„ჩვენ გვსურს აქტიური მუშაობა დავიწყოთ სამოქალაქო სექტორთან ერთად და თავისუფალი არჩევნებისთვის ვიბრძოლოთ სწორედ ხალხისთვის პატივსაცემი და ავტორიტეტული საზოგადოების თანამონაწილეობით. ჩვენ გთავაზობთ, შევქმნათ სამუშაო ჯგუფები სხვადასხვა მიმართულებით, მათ შორის ყველაზე პრობლემური საკითხების - მედიამონიტორინგისა და უფლებათა დაცვის კუთხით", - განაცხადა შეხვედრაზე „თავისუფალი დემოკრატების" ლიდერმა ირაკლი ალასანიამ.
მისივე თქმით, ოპოზიციური „ექსვსეული" სამოქალაქო სექტორს „დახმარებას" რეგიონებში დაგეგმილ გასვლით შეხვედრებთან დაკავშირებითაც სთავაზობს და განმარტა, რომ ხალხთან ურთიერთობისას საჭიროა მათთვის ავტორიტეტული წარმომადგენლების გამოჩენა.
ალასანიას შეფასებით, მოსახლეობა (განსაკუთრებით რეგიონებში მაცხოვრებლები) საქართველოში მიმდინარე პროცესების შესახებ სათანადოდ ინფორმირებული არაა, რაც ოპოზიციურმა ძალებმა სწორედ სამოქალაქო საზოგადოებასთან ერთად უნდა უზრუნველყოს.
ამასთან, „ექვსეულის" ერთ-ერთი ლიდერი აქცენტს პროცესში ახალგაზრდების გააქტიურებასა და თავისუფალი არჩევნების სწორედ მათი თანამონაწილეობით მიღწევაზეც აკეთებს და აცხადებს, რომ მსოფლიოში არც ერთი ცვლილება ახალგაზრდების თანამონაწილეობის გარეშე არ მომხდარა.
