ბათუმის იუსტიციის სახლში დღეს, საჯარო რეესტრის წარმომადგენლები ბათუმში მოქმედ კერძო კომპანიებს და სააგენტოს ავტორიზებულ მომხმარებლებს შეხვდნენ.
შეხვედრის მიზანი იყო მჭიდრო თანამშრომლობა სააგენტოს ავტორიზებულ მომხმარებელთან, ახალი მომსახურებების შეთავაზება და სააგენტოს სიახლეების გაცნობა, მათი პრობლემების და წინადადებების განხილვა, რაც სამომავლოდ ხელს შეუწყობს მოქალაქეებსა და სააგენტოს პარტნიორ კომპანიებს შორის ურთიერთთანაშრომლობის გამარტივებას და მათი მხრიდან უფრო მეტი კლიენტის მოზიდვას.
იუსტიციის სამინისტროში განხორციელებულმა რეფორმებმა ხელი შეუწყო ქვეყანაში კერძო სექტორის გააქტიურებას, მცირე და საშუალო ბიზნესის, უძრავი ქონების ბაზრის განვითარებას. დღეისთვის სააგენტოსთან აქტიურად თანამშრომლობენ კომერციული ბანკები, ნოტარიუსები, იურიდიული და საამზომველო ფირმები, დეველოპერული, სადაზღვევო კომპანიები და ყველა ის კერძო სუბიექტი, რომელიც უძრავი ქონების ბაზრით არიან დაინტერესებულნი.
ელექტრონული პროგრამების დანერგვამ საჯარო რეესტრსა და უძრავი ქონების ბაზარზე მოქმედ კომპანიებს შორის თანამშრომლობის ახალი ფორმა წარმოშვა. სააგენტოსთან მემორანდუმის გაფორმებით, კერძო კომპანიებს საშუალება მიეცათ ოფისიდან გაუსვლელად, ვებგვერდის მეშვეობით სრული დისტანციური მომსახურება აწარმოონ და მომხმარებლებს მომსახურების ახალი სერვისი შესთავაზონ, რაც ხელს უწყობს მათთვის დამატებითი შემოსავლების მიღებას.
მოქალაქეებს კი, რომელთაც უძრავი ქონების რეგისტრაციასთან დაკავშირებული საკითხების მოგვარება სურთ, შეუძლიათ უძრავი ქონების დასარეგისტრირებლად იუსტიციის სახლის ნაცვლად, თავიანთ სახლთან ახლოს, თავიანთ უბანში საჯარო რეესტრის ავტორიზებულ მომხმარებლებს მიმართონ და მარტივად მიიღონ მომსახურება.
როგორც საჯარო რეესტრის ავტორიზებულ კომპანიებთან ურთიერთობის ჯგუფის მენეჯერმა თამარ თუთარაშვილმა განაცხადა „საჯარო რეესტრის ეროვნულმა სააგენტომ კერძო კომპანიებთან თანამშრომლობა 2006 წლიდან დაიწყო. საქართველოს მასშტაბით, ამ პერიოდში უკვე 365 კერძო კომპანიაა სააგენტოს ავტორიზებული მომხმარებელი. აქედან 15 კომპანია აჭარის რეგიონში მოქმედებს.
დაინტერესებული კომპანიების რიცხვი დღითიდღე იზრდება, რაც კიდევ ერთხელ ადასტურებს საჯარო რეესტრის მიერ განხორციელებული რეფორმების სანდოობასა და ეფექტურობას".
ქვეყნის მასშტაბით 2010 წელს ავტორიზებული კომპანიების რაოდენობა 350 იყო, 2009 წელს - 343 , 2008 წელს მათი რაოდენობა 238 შეადგენდა, 2007 წელს - 88, 2006 წელს ავტორიზებულ მომხმარებელთა რაოდენობა 24 იყო.