ფრანგულმა ბიზნესმა შესაძლოა საქართველოში ტურიზმისა და სოფლის მეურნეობის დარგში ინვესტიცია განახორციელოს.
ეკონომიკისა და მდგრადი განვითარების სამინისტროს ინფორმაციით, 20-22 ივნისს მინისტრი ვერა ქობალია სამუშაო ვიზიტით საფრანგეთის რესპუბლიკაში იმყოფებოდა. გაიმართა შეხვედრები საფრანგეთის სამთავრობო და ბიზნეს წრეების წარმომადგენლებთან. საუბარი წარიმართა ორი ქვეყნის თანამშრომლობის გაღრმავებაზე ეკონომიკის სხვადასხვა სექტორში.
ქობალიას განცხადებით, პოლიტიკურ დონეზე ორი ქვეყნის პარტნიორული კავშირები გადაეცემა ფრანგულ ბიზნესსაც. მისი თქმით, გამოიკვეთა ეკონომიკური თანამშრომლობის მიმართულებები, მათ შორის, ტურიზმისა და სოფლის მეურნეობის განვითარების სექტორებში.
საფრანგეთის რეგიონალური ეროვნული პარკების ფედერაციის წარმომადგენლებთან საუბარი შეეხო ფრანგული მხარის მიერ კარგად აპრობირებულ მოდელს, რომელსაც დაცული ტერიტორიების მოვლა-პატრონობაში მთავრობას ადგილობრივი მოსახლეებიც ეხმარებიან, თუმცა, მეორე მხრივ, მთავრობის მხრიდან ხდება მცირე და საშუალო ოჯახური მეურნეობების ფინანსური წახალისება, რომლებიც დაცული ტერიტორიების სიახლოვეს ცხოვრობენ. მსგავსი მოდელი საფრანგეთმა სხვა ქვეყნებშიც დანერგა და დადებითი შედეგიც მიიღო.
ვიზიტის ფარგლებში, ეკონომიკისა და მდგრადი განვითარების მინისტრი დაესწრო ავიასალონს ლე ბურჟეში, რომელზედაც სიახლები წარმოადგენა 200-ზე მეტმა კომპანიამ. ავიასალონის დღის წესრიგი 140 თვითმფრინავისა და სხვა საჰაერო აპარატების გამოცდას ითვალისწინებს. ქობალია აგრეთვე დაესწრო განზრახულობათა ოქმის ხელმოწერის ცერემონიალს, რომელიც გაფორმდა ფრანგულ კომპანია ATF და "საქართველოს აეროპორტების გაერთიანებას" შორის. ფრანგული კომპანია მსოფლიოს ერთ-ერთი ლიდერია ტურბოპროპელერული თვითმფრინავების წარმოებაში. ეს კომპანია მსოფლიოს ყველაზე მწვანე ავიაკომპანიათა სათავეშია. ეკონომიკისა და მდგრადი განვითარების მინისტრმა მისი წარმოებული უახლესი მოდელის თვითმფრინავი დაათვალიერა.