გოდერძის უღელტეხილზე სათხილამურო კურორტის მშენებლობა აქტიურ ფაზაში გადადის. აჭარის ავტონომიური რესპუბლიკის 100 %-იანი წილობრივი მონაწილეობით შექმნილ შპს "Goderdzi Resorts~-ის კაპიტალს მთავრობა 2 მლნ. ლარით ზრდის, რათა კომპანიამ თანამედროვე სტანდარტების სათხილამურო კომპლექსის პროექტირებისა და მშენებლობის პირველი ეტაპის სამუშაოების, ასევე აღნიშნული შპს-ს სახელფასო და ფუნქციონირებისათვის საჭირო სხვა ხარჯები დაფაროს.
როგორც სააგენტო "ჯი-ეიჩ-ენთან" საუბრისას, აჭარის ტურიზმის დეპარტამენტის თავმჯდომარემ ვაჟა დიასამიძემ განაცხადა, გოდერძის უღელტეხილზე სახელმწიფო საბაგირო გზისა და რამდენიმე კოტეჯის მშენებლობას იწყებს. უკვე ცნობილია, რომ ორი საბაგირო გზის მონტაჟს უღელტეხილზე ფრანგული კომპანია "პომა" განახორციელებს. მთავრობა სამთო კურორტს მისასვლელი გზითაც უზრუნველყოფს და სწორედ ამის შემდეგ შეეცდება ინვესტორების დაინტერესებას. ვაჟა დიასამიძე აცხადებს, რომ ინვესტორების მოზიდვის მიზნით, მთავრობა გარკვეული შეღავათების დაწესებასაც აპირებს.
ტურისტებისთვის არანაკლებ მიმზიდველი ადგილი უკვე გახდა ქედლები და გომარდული. აჭარის მაღალმთიანეთში არსებული ზამთრის კურორტების ჩამონათვალს გოდერძის უღელტეხილიც შეემატება.
ახალი სათხილამურო კურორტის პრეზენტაცია გოდერძის უღელტეხილზე შედგა ჯერ კიდევ გასულ წელს შედგა, სადაც პრეზიდენტმა აჭარის მთავრობის თავმჯდომარესთან და საქართველოს ეკონომიკისა და მდგრადი განვითარების მინისტრთან ერთად პროექტის დეტალებზე ისაუბრა.
გოდერძის უღელტეხილზე ინფრასტრუქტურული სამუშაოები უკვე დაწყებულია. მიმდინარეობს გზის სარეაბილიტაციო სამუშაოები. კურორტის ინფრასტრუქტურაზე მუშაობა კი აქტიურ ფაზაში რამდენიმე თვეში შევა.
გოდერძის უღელტეხილზე საბაგირო გზა და დასასვენებელი კომპლექსები უნდა აშენდეს. კურორტი ტურისტებს მთელი წლის განმავლობაში უმასპინძლებს.