სტიქიის შედეგად მიყენებული ზარალის აღმოსაფხვრელად საჭირო თანხები მთავრობის სარეზერვო ფონდიდან გამოიყოფა. ამის შესახებ ჟურნალისტებს ფინანსთა მინისტრის მოადგილე პაპუნა პეტრიაშვილმა განუცხადა.
„თანხმები მთავრობის სარეზერვო ფონდიდან იქნება გამოყოფილი. ეს ფონდი სწორედ იმიტომ არსებობს, რომ მსგავსი ტიპის სამუშაოები დააფინანსოს. ერთი სიტყვით, ბიუჯეტი მზადაა თანხმების გამოსაყოფად და საჭიროების შესაბამისად, საჭირო თანხა იქნება გამოყოფილი", - განმარტა პეტრიაშვილმა.
მინისტრის მოადგილე სტიქიის შედეგად მიყენებული ზარალის ზუსტ ოდენობას ამ ეტაპზე არ აკონკრეტებს და აცხადებს, რომ საბოლოო ციფრები „ამ დღეებში" დაზუსტდება.
შეგახსენებთ, რომ ძლიერმა წვიმებმა საქართველოს რეგიონებში მნიშვნელოვანი პრობლემები შექმნა. ნიაღვარმა და ღვარცოფმა დააზინა გზები, ხიდები, საკანალიზაციო სისტემები, წყალმომარაგებისთვის საჭირო ინფრასტრუქტურა და შექმნა სხვა სახის პრობლემებიც. სტიქიას მსხვერპლიც მოჰყვა. რიკოთის უღელტეხილზე გზის ჩამოშლის შედეგად 6 ადამიანი დაიღუპა.