სტიქიის შედეგად დაზიანებული ინფრასტრუქტურის აღდგენისთვის ქვემო ქართლს 2 მილიონი ლარი, შიდა ქართლს 500 ათასი, მცხეთა-მთიანეთის რეგიონს კი 700 ათასი ლარი გამოეყოფა. ამის შესახებ პრემიერ-მინისტრ ნიკა გილაურთან შეხვედრის დასრულების შემდეგ ჟურნალისტებს თავად რეგიონებში პრეზიდენტის რწმუნებულებმა და მათმა მოადგილეებმა განუცხადეს.
„გაკეთებულია პროექტები. ყველა საკითხი დაყენებულია პრემიერთან და მათი აბსოლუტური უმრავლესობის გადაწყვეტა მოხდა. უახლოეს დღეებში დაიწყება აღდგენითი სამუშაოები. ქვემო ქართლის მხრიდან მოთხოვნილი იქნა ორი მილიონი ლარი, რათა აღდგენილ იქნას დაზიანებული ინფრასტრუქტურა. ჩვენი მოთხოვნა პრემიერმა დააკმაყოფილა", - განაცხადა ქვემო ქართლის გუბერნატორმა დავით კირკიტაძემ.
მცხეთა-მთიანეთში პრეზიდენტის რწმუნებულის მოადგილის, გივი ამირხანაშვილის თქმით კი, დაახლოებით 700 ათასი ლარი დასჭირდება რეგიონში სტიქიის შედეგად დაზიანებული ინფრასტრუქტურის აღდგენას.
„ძირითადად დაზიანებულია გზები, სასმელი წყლების ნაგებობები და ხიდები", - განუცხადა მან „ჯი-ეიჩ-ენს".
რაც შეეხება შიდა ქართლს, გუბერნატორ ზურაბ არსოშვილის თქმით, მის დაქვემდებარებაში მყოფ რეგიონში დაზიანებული ინფრასტრუქტურის აღდგენა დაახლოებით 500 ათასი ლარი დაჯდება.
„პრემიერმა დეტალებში გაიარა არა მარტო შიდა ქართლის, არამედ ყველა იმ რეგიონში არსებული მდგომარეობა, რომელსაც სტიქიის შედეგად პრობლემები შეექმნა. კონკრეტულ ციფრებზე ლაპარაკი არ ყოფილა, მაგრამ ცნობილია, რომ სტიქიამ ყველაზე მეტად გზები, ხიდები, საკანალიზაციო და სისტემები და წყალმომარაგებისთვის საჭირო ნაგებობები დააზიანა. ზარალი ითვლება. მხოლოდ შიდა ქართლისთვის, სავარაუდოდ, 500 ათასი იქნება გამოყოფილი ინფრასტრუქტურის აღსადგენად", - განმარტა ზურაბ არსოშვილმა.
შეგახსენებთ, რომ პრემიერმა ნიკა გილაურმა გუბერნატორებთან საგანგებო შეხვედრა გამართა. სახელმწიფო კანცელარიაში გამართულ შეხვედრას იმ რეგიონების რწმუნებულები ესწრებოდნენ, რომლებიც სტიქიის შედეგად დაზარალდნენ.
