სექტემბერში, გურჯაანში, სოფელ ჩალაუბანში, ხილის გადამამუშავებელი საწარმოს მშენებლობა დაიწყება. 12 მილიონი ევროს ინვესტიციას უკრაინული კომპანია "iabloChni dar" განახორციელებს. ხილის გადამამუშავებელი ქარხანა ყოველ წლიურად 200-300 ათას ტონა ხილს გადამუშავებს. ქარხანაში 100-ზე მეტი ადამიანი დასაქმდება.
კომპანიას დაგეგმილი აქვს ახალმა საწარმომ 2012 წელს უკვე მიიღოს 50 ათასი ტონა ყურძენი. თავად კომპანია კონცენტრატებით უკრაინასა და ევროპის რამდენიმე ქვეყანას ამარაგებს.
"ეს ჩვენს მიერ მოძიებული კიდევ ერთი დიდი ინვესტიციაა. შედგა მოლაპარაკება კომპანიის მფლობელებთან და გადაწყდა, რომ გურჯაანში უფრო დიდი და მაშტაბური ქარხანა აშენდება, ვიდრე პოლონეთსა და უკრაინაში,"- აღნიშნა განაცხადა კახეთის გუბერნატორმა გიორგი ღვინიაშვილმა.
შეგახსენებთ, რომ ივნისში კახეთის გუბერნატორი გიორგი ღვინიაშვილი, გურჯაანის მაჟორიტარი დეპუტატი გიორგი ჩივიაშვილი და გურჯაანის მუნიციპალიტეტის გამგებელი, შოთა უტიაშვილი ოფიციალური ვიზიტით პოლონეთსა და უკრაინაში იმყოფებოდნენ, სწორედ მათი ვიზიტისას მოხდა ამ უკრაინელ ინვესტორებთან მოლაპარაკებები.