"ნავთობპროდუქტების იმპორტიორთა კავშირმა და ნავთობპროდუქტების სერტიფიკაციის ორგანო "მონიტორინგმა" მიმდინარე წლის ივნისის თვეში განახორციელეს ერთობლივი მონიტორინგი კომპანია ,,სოკარ ჯორჯია პეტროლეუმის" მიერ იმპორტირებული აზერბაიჯანის რესპუბლიკის სახელმწიფო ნავთობკომპანიის წარმოებული ბენზინისა (რეგულარი) და დიზელის (ლ-62) საწვავის ხარისხთან დაკავშირებით.
მონიტორინგი განხორციელდა სპეციალურად ზაფხულის პერიოდში, შვებულებებისა და ტურისტული სეზონის დაწყებასთან დაკავშირებით, როდესაც იზრდება საწვავის მოხმარება. შემოწმება განხორციელდა მთელი საქართველოს მასშტაბით.
მონიტორინგის შედეგად დადგინდა, რომ A-91 რეგულარის ტიპის ბენზინი რეალურად არის 93 - 93.5 ოქტანის, მაშინ როცა სტანდარტით უნდა იყოს არანაკლებ 91 ერთეულისა. ოქტანური რიცხვი გახლავთ საწვავის ერთ-ერთი ძირითადი ფიზიკური მახასიათებელი.
ტყვიის შემცველობა მასში ფაქტიურად არ არის - 0,0009 - 0,0010 ერთეული (მოქმედი კანონმდებლობით - უნდა იყოს არა უმეტეს 0,013 ერთეულისა); არომატული ნახშირწყალბადების მოცულობითი წილი შეადგენს 25 - 30 პროცენტს (საქართველოს მოქმედი კანონმდებლობით უნდა იყოს არა უმეტეს 45 პროცენტისა); ბენზოლის მოცულობითი წილი არის 0.9 - 1.0 პროცენტამდე (მოქმედი კანონმდებლობით უნდა იყოს არა უმეტეს 5 პროცენტისა); გოგირდის შემცველობა არის 150 ერთეული (მოქმედი კანონმდებლობით უნდა იყოს არა უმეტეს 500 ერთეულისა).
მონიტორინგის დროს განსაკუთრებით ხაზგასმული იყო დიზელის საწვავში წყლის შემცველობის განსაზღვრა, რადგან დიზელის საწვავში წყლის არსებობა იწვევს ავტომობილის მნიშვნელოვან პრობლემებს. შემოწმების შედეგად, დიზელის საწვავში წყალი არ აღმოჩნდა.
