საფინანსო-საბიუჯეტო კომიტეტის თავმჯდომარის ზურაბ მელიქიშვილის განცხადებით, სტიქიის სალიკვიდაციო სამუშაოებისთვის ბიუჯეტში თანხები გათვალისწინებულია.
ამის შესახებ მელიქიშვილმა დღეს, პარლამენტის ბიუროს სხდომაზე განაცხადა და სამძიმარი გამოიცხადა სტიქიის დროს დაღუპულების ოჯახებს.
"მინდა გითხრათ, რომ არა მხოლოდ რიკოთის უღელტეხილზე, არამედ საქართველოს სხვა ტერიტორიებზე, მათ შორის კახეთში, მცხეთა-მთიანეთში, იმერეთში, შიდა ქართლში სტიქიამ დიდი ზარალი მოგვაყენა", - აღნიშნა დეპუტატმა.
მისივე თქმით, ყველა ჯგუფი ადგილზეა მობილიზებული, როგორც ადგილობრივი მმართველობის ასევე თვითმართველობის, ცენტრალური ხელისუფლების, შინაგან საქმეთა სამინისტროს, სხვა სტრუქტურების, რომლებიც ამ მიმართულებით მუშაობენ.
"ერთი მხრივ, მიმდინარეობს აღდგენით სამუშაოები, მეორეს მხრივ ხდება ზარალის დათვლა. ამ დროისთვის, მხოლოდ ზარალის სავარაუდო ციფრებზე შეიძლება საუბარი და მინდა განვაცხადო, რომ ეს თანხები საქართველოს ბიუჯეტში არის გამოყოფილი, სალიკვიდაციო სამუშაოებზე მაქვს საუბარი", - აღნიშნა საფინანსო კომიტეტის თავმჯდომარემ.
ამასთან, მელიქიშვილის თქმით, თუ საჭირო გახდება ამ მიმართულებით ცვლილებების შეტანა ბიუჯეტში პარლამენტი და მთავრობა ამ საკითხებზეც მჭიდროდ თანამშრომლობენ.