საქართველოში ნაპირსამაგრი სამუშაოების სრულად განხორციელებისთვის 30 მილიარდამდე ლარია საჭირო. ამის შესახებ ბიუროს სხდომაზე საფინანსო-საბიუჯეტო კომიტეტის თავმჯდომარეომ, ზურაბ მელიქიშვილმა, ქრისტიან-დემოკრატების ლიდერის, გიორგი თარგამაძის საპასუხოდ განაცხადა.
"მსგავსი სტიქიური მოვლენები, სამწუხაროდ, ხშირია და სრულად რომ მოხდეს ყველა ნაპირსამაგრი სამუშაოს განხორციელება, 30 მილიარდამდე მაინც არის საჭრო. მაშინ, როდესაც მიუხედავად ჩვენი დიდი ძალისხმევისა, საქართველოს ბიუჯეტი 7 მილიარდ 350 მილიონია", _ აღნიშნა მელიქიშვილმა.
მისი თქმით, ნაპირსამაგრი სამუშაოსთვის ყოველწლიურად ბიუჯეტში თანხა გამოიყოფა და ეს სახსრები იმ რეგიონებს ხმარდება, სადაც გადაუდებლადაა განსახორციელებელი სამუშაო.
მელიქიშვილის თქმით, წინა ხელისუფლებას რომ ეზრუნა აღნიშნული პრობლემების მოგვარებაზე, ქვეყანას ახლა საფრთხე არ შეექმნებოდა, თუმცა ამ კუთხით მაშინ არავინ არაფერს კეთებდა.
"ყველა ეს პრობლემა დღის წესრიგში დგას, მაგრამ ბიუჯეტი რომელიც 7 მილიარდ 350 მილიონი ლარია, პრიორიტეტულ სფეროებზეა გადანაწილებული ", _ აცხადებს მელიქიშვილი.