რუსეთის პრეზიდენტის დიმიტრი მედვედევის თქმით, მომავალი წლის საპრეზიდენტო არჩევნებზე კონკურენციამ მასა და ვლადიმერ პუტინს შორის შესაძლოა ზიანი მიაყენოს იმ მიზნებსა და ამოცანებს, რომლებსაც ისინი ბოლო წლების განმავლობაში ახორციელებდნენ. ეს განცხადება დიმიტრი მედვედევმა "The Financial Times"-სთან საუბარში გააკეთა.
"მიმაჩნია, რომ ეს - არჩევნებში ერთდროულად ორივეს მონაწილეობა - ძნელი წარმოსადგენია სულ მცირე, თუნდაც ერთი მიზეზით: ჩვენ ვლადიმერ პუტინთან ერთად, ჩემს კოლეგასთან და ძველ მეგობართან ერთად - მაინც ერთსა და იგივე პოლიტიკურ ძალას წარმოვადგენთ და ამ აზრით ჩვენს შორის არსებულმა კონკურენციამ შესაძლოა ზიანი მიაყენოს იმ მიზნებსა და ამოცანებს, რომლებსაც ჩვენ ერთად ვახორციელებდით ბოლო წლების განმავლობაში", _ აცხადებს მედვედევი და დასძენს, რომ "ამიტომაც ალბათ ეს არ იქნებოდა საუკეთესო სცენარი ჩვენ ქვეყნისათვის".
ამასთან ერთად, რუსეთის პრეზიდენტმა მოცემულ სიტუაციაში ჯანსაღი კონკურენციის სარგებლობაც აღნიშნა. ამ ინტერვიუში მან ასევე არ უპასუხა კითხვას მიიღებს თუ არა მონაწლეობას მომავალ არჩევნებში.
"მაგრამ მე თქვენ ერთ რამეს გეტყვით - მიმაჩნია, რომ ნებისმიერი ხელმძღვანელი, რომელსაც ისეთი პოზიცია უჭირავს როგორც პრეზიდენტს, უბრალოდ, ვალდებულია სურდეს კენჭისყრა", _ აცხადებს მედვედევი და აღნიშნავს, რომ მისი აზრით, ის გადაწყვეტილება, რომელსაც იგი მიიღებს სწორი იქნება, როგორც რუსეთის ფედერაციისათვის ისე პირადად მისთვის.
