თბილისში საერთაშორისო საავტომობილო ტრანსპორტის კავშირის მე-6 კონფერენციაზე (IRU's 6th Euro-Asian Road Transport Conference, www.iru.org) მინისტრებმა ერთობლივი დეკლარაცია მიიღეს. კონფერენციას, რომელიც შოთა რუსთაველის სახელობის სახელმწიფო დრამატულ თეატრში იმართება, რამდენიმე ქვეყნის ტრანსპორტისა და ინფრასტრუქტურის მინისტრი და 22 საერთაშორისო ორგანიზაციის ხელმძღვანელი პირები ესწრებიან. კონფერენციის ფარგლებში გაიმართა თბილისის მინისტერიალი სახელწოდებით "ვაჭრობისა და საავტომობილო გადაზიდვების გამარტივება აბრეშუმის გზაზე" .
მინისტერიალმა დღეს ერთობლივი დეკლარაცია მიიღო, რომელსაც ხელი მოაწერეს კონფერენციაში მონაწილე ქვეყნების ტრანსპორტის სამინისტროების და საავტომობილო ტრანსპორტის საერთაშორისო კავშირის ხელმძღვანელმა პირებმა. დეკლარაციის მთავარი მესიჯია, "აღმოფხვრან არა-ფიზიკური ბარიერები ვაჭრობისა და საავტომობილო გადაზიდვების პროცედურებში, ისეთები როგორიცაა საზღვრებთან ხანგრძლივი დროით სეყოვნება, ბიუროკრატია, კორუფცია, პროფესიონალი მძღოლებისათვის ვიზების გაცემა და სხვა არახელსაყრელი სამართებლივი და ტექნიკური პირობები".
როგორც საქართველოს ეკონომიკისა და მდგრადი განვითარების მინისტრმა აღნიშნა, მინისტერიალის წევრი ქვეყნები დეკლარაციაზე ხელმოწერით აცხადებენ, რომ "მნიშვნელოვანია, საერთაშორისო დონეზე სატრანსპორტო გადაზიდვებში შევამციროთ ბიუროკრატია და შევქმნათ უფრო მარტივი პროცედურები, რათა სატრანსპორტო გადაზიდვები მეტად ეფექტური გახდეს". ვერა ქობალიას განცხადებით, ეს ხელს შეუწყობს არამარტო ტრანსპორტის, არამედ მრეწველობისა და ვაჭრობის სფეროების განვითარებას.
კონფერენცია ორი დღის განმავლობაში (16-17 ივნისი) მუშაობს და მისი მიმდინარეობისას ყურადღება დაეთმო კავკასიის რეგიონში ტრანსპორტთან დაკავშირებულ საკითხებს და დიდი აბრეშუმის გზის გასწრივ საჭირო სატრანსპორტო ინფრასტრუქტურის განვითარების აუცილებლობას. ამასთან, კონფერენციის მიმდინარეობისას განხილულ იქნა საქართველოს, როგორც ევროპისა და აზიის დამაკავშირებელი ქვეყნის სტრატეგიული როლი სატრანსპორტო, მათ შორის როგორც სახმელეთო, ისე საჰაერო და საზღვაო ტრანსპორტის სფეროში.
