თბილისის შემდეგ, "აირზენა" მოსკოვის მიმართულებით ჩარტერული რეისების შესრულებას ბათუმის საერთაშორისო აეროპორტიდანაც იწყებს. როგორც სააგენტო "ჯი-ეიჩ-ენთან" საუბრისას, ავიაკომპანია "აირზენას" წარმომადგენელმა ნინო გიორგობიანმა განაცხადა, "აირზენა" ბათუმიდან მოსკოვის მიმართულებით რეისებს კვირაში 2 ჯერ შეასრულებს. გიორგობიანის თქმით, ბათუმი-მოსკოვის რეისზე, ბილეთის ღირებულება ერთი გზა 193 ევროდან იწყება.
მზარდი მოთხოვნის ფონზე "აირზენა" რეისების რაოდენობას ზრდის კიევის მიმართულებით. როგორც ნინო გიორგობიანმა განაცხადა, დღემდე ბათუმიდან კიევის მიმართულებით რეისები კვირაში სამჯერ ხორციელდებოდა, თუმცა მზარდი მოთხოვნის ფონზე ავიაკომპანიამ რეისების რაოდენობის დამატება გადაწყვიტა და ამიერიდან ბათუმიდან კიევის მიმართულებით "აირზენა" ყოველდღიურად იფრენს.
"აირზენას" წარმომადგენელი აცხადებს, რომ ბათუმის მიმართულებით მგზავრთა ნაკადი იზრდება თელ-ავივიდანაც, რომლის განხორციელებაც კომპანიამ 5 ივნისიდან დაიწყო. რეისები კვირა დღეს სრულდება. ნინო გიორგობიანის თქმით, კვირას თელ-ავივიდან მესამე ავიარეისი შესრულდება. მთლიანობაში სამივე რეისით ბათუმში 350 ზე მეტი მგზავრი ჩავა. ავიაკომპანიის მონაცემებით, თელ-ავივიდან ბათუმში პირველი რეისით 105 მგზავრი ჩამოვიდა, მეორე რეისით 116 მგზავრი, ხოლო მესამე რეისით 130 მგზავრი ჩამოვა. "აირზენას" ინფორმაციით თელ-ავივიდან მგზავრთნაკადი მომავალშიც გაიზრდება.
"აირზენა" 18 ივნისიდან იწყებს ასევე ბათუმი ბაქოს ავიარეისების შესრულებას, ავიაკომპანია ყოველდღიურად დაფრინავს ასევე ბათუმი-თბილისი მიმართულებითაც. ნინო გიორგობიანის განცხადებით, "აირზენას" ყოველკვირაში ბათუმში დაახლოებით 750 მგზავრი ჩაყავს.