"საწარმოთა უმრავლესობა ვერ ასრულებს წესდებით გათვალისწინებულ ფუნქციას. შესაბამისად სახელმწიფო ვერ იღებს იმ შედეგს, რომელსაც ამ საწარმოების ჩამოყალიბების დროს მოელოდა"- ამის შესახებ აჭარის კონტროლის პალატის 2010 წლის ანგარიშშია ნათქვამი.
კონტროლის პალატის ინფორმაციით, სახელმწიფოს წილობრივი მონაწილეობით შექმნილ საწარმოებში ჩატარებული აუდიტებით გამოიკვეთა შემდეგი სახის პრობლემები: საწარმოთა უმრავლესობა ვერ ასრულებს წესდებით გათვალისწინებულ ფუნქციას. შესაბამისად სახელმწიფო ვერ იღებს იმ შედეგს, რომელსაც ამ საწარმოების ჩამოყალიბების დროს მოელოდა. ეს ზოგჯერ საწარმოს მატერიალურ-ტექნიკური ბაზის სიძველითაა განპირობებული, ზოგ შემთხვევაში კი საწარმოს არაეფექტიანი მართვით. აჭარის პალატის ანგარიში ნათქვამია ასევე, რომ არ ხდება საწარმოთა გამგებლობაში არსებული ქონების დანიშნულებისამებრ გამოყენება და ჯეროვანი მოვლა-პატრონობა. საწარმოები ნაკლებ ყურადღებას უთმობენ დებიტორულ-კრედიტორული დავალიანებების დაფარვას და გადასახადების სახელმწიფო ბიუჯეტში გადახდას.
"მნიშვნელოვანი დარღვევებით ხდება საიჯარო ხელშეკრულებების გაფორმება და შემოსავლების აღრიცხვა. გაწეული ხარჯები ბევრად აღემატება შემოსავლებს. შესაბამისად ისინი საანგარიშო წელს ზარალით ამთავრებენ"- ნათქვამია ანგარიშში.
აღსანიშნავია, რომ კონტროლის პალატიდან აჭარის ავტონომიური რესპუბლიკის ფინანსთა და ეკონომიკის სამინისტროს უკვე გადაეგზავნა რეკომენდაცია წილობრივი მონაწილეობით შექმნილი შპს-ების ფუნქციონირების მიზანშეწონილობის საკითხის განხილვის შესახებ.
