2010 წელს, აჭარის კონტროლის პალატამ სხვადასხვა სფეროში მოქმედი კანონმდებლობის დარღვევის დაახლოებით 200-მდე შემთხვევა დააფიქსირა.
როგორც სააგენტო "ჯი-ეიჩ-ენს" კონტროლის პალატაში განუცხადეს., აჭარის კონტროლის პალატის მიერ ჩატარებული აუდიტების შედეგად გამოვლინდა საბუღალტრო აღრიცხვის, სახელმწიფო შესყიდვების განხორციელების, ხელშეკრულებათა პირობების შესრულების შესაბამისობის ნაკლოვანებები და დარღვევები:
აჭარის კონტროლის პალატის ანგარიშში ნათქვამია, რომ აჭარის ავტონომიური რესპუბლიკის სოფლის მეურნეობის სამინისტროს მიერ მომწოდებლისაგან 2009 წლის 15 ივნისს მიღებული 75 ერთეული მცირე მექნიზაციის ტექნიკური საშუალებები 195,0 ათასი ლარის ღირებულებით, შემოსავალში აღების ნაცვლად ჩამოწერილია ხარჯებში და შესაბამისად არ იყო ასახული 2009 წლის 6 თვის ფინანსურ ანგარიშგებაში. იმავდროულად, შუახევის მუნიციპალიტეტის მიერ, ხელშეკრულებებით გაუთვალისწინებელი სამუშაო მოცულობების ფაქტობრივმა მდგომარეობამ განაპირობა ხარჯთაღრიცხვით გათვალისწინებული 35,8 ათასი ლარის სამუშაოების შეუსრულებლობა. ვალდებულებების დროულად შეუსრულებლობის ფაქტების არსებობის პირობებში დარიცხული არ არის პირგასამტეხლო 151,7 ათასი ლარი.
მონიტორინგის შედეგად, კონტროლის პალატამ, ხარჯვის დამადასტურებელი დოკუმენტაციის არარსებობის ფაქტები გამოავლინა. დასკვნის მიხედვით, შუახევის დაბის სანიტარული დასუფთავებისა და კეთილმოწყობის მიზნობრივ პროგრამებში არ არის განსაზღვრული შესასრულებელ სამუშაოთა მოცულობები და პერიოდულობა. არ არის შედგენილი მიღება-ჩაბარების აქტები. წარმოდგენილია მხოლოდ სასაქონლო ზედნადებები და არ არის ცნობილი პროგრამით გათვალისწინებული სამუშაოები რა მოცულობით და რა ღირებულებით იქნა შესრულებული, ამასთან, შუახევის მუნიციპალიტეტის ტერიტორიაზე მცხოვრები, სოციალურად დაუცველი ფენისათვის მუნიციპალური უფასო სასადილოს მიზნობრივი პროგრამის ფარგლებში გამოყოფილი თანხის მიზნობრივად ხარჯვა არსებული დოკუმენტაციით ვერ დგინდება.
აჭარის კონტროლის პალატის ანგარიშში ნათქვამია ასევე, რომ ადგილი ქონდა სახელმწიფო სახსრების არაეფექტიან და არამიზნობრივი ხარჯვას.
"მაგალითად, შუახევის მუნიციპალიტეტის მიერ კრედიტორული დავალიანებების დასაფარად გადახდილია 32,4 ათასი ლარი, რომლის წარმოშობის რეალობაც არსებული დოკუმენტების შესაბამისად არ დასტურდება. შპს „შუახევის სასწრაფო-სამედიცინო დახმარების სამსახურის" ავტომანქანის შეკეთებისათვის, აჭარის ავტონომიური რესპუბლიკის რესპუბლიკური ბიუჯეტის სარეზერვო ფონდიდან გამოყოფილი 1,3 ათასი ლარის ხარჯვა არ დასტურდება შესრულებულ სამუშაოთა განმსაზღვრელი დოკუმეტაციით. ავანსად, ყოველგვარი დოკუმენტაციის წარმოდგენის გარეშე ინდ. მეწარმეზე გაცემულია 10,0 ათასი ლარი.
ასევე, ვანის, ზემოხევის და ახალდაბის საჯარო სკოლების, ბუთურაულისა და გომარდულის მინისპორტული მოედნების მშენებლობის, ხიჭაურის-ხაბელაშვილების წყალსადენისა და შუახევის საკანალიზაციო სისტემის მეორე შტოს რეაბილიტაციისა და სასმელი წყლის აუზების მშენებლობის და პოლიეთილენის მილების შესყიდვაზე ჩატარებული ტენდერის დოკუმენტებით კომისიის წევრთა შეფასების საფუძვლიანობა არ არის დასაბუთებული"- ნათქვამია 2010 წლის ანგარიშში.
კონტროლის პალატაში აცხადებენ, რომ სსიპ „შოთა რუსთაველის სახელმწიფო უნივერსის" არასწორი მართვის შედეგად ბიუჯეტში 19674 ლარით ნაკლები შემოსავლები შევიდა.
კონტროლის პალატის ინფორმაციით, მათ მიერ ჩატარებული მონიტორინგისას გამოვილდა არასწორი ფინანსური მართვისა და დამატებითი სახსრების არაეფექტიანი, არამიზნობრივი ხარჯვის ფაქტები. მაგალითად, სსიპ „შოთა რუსთაველის სახელმწიფო უნივერსიტეტის" მიერ განხორციელებული არასწორი ფინანსური მართვით, რაც გამოიხატება უნივერსიტეტის ბალანსზე რიცხული თავისუფალი ფართის სარგებლობისათვის საიჯარო ქირის გადახდის უზრუნველყოფაში, მიღებულია 19674 ლარით ნაკლები შემოსავლები.
უნივერსიტეტის 2009 წლის ბიუჯეტით განსაზღვრული დანამატი, ფაქტიურად გაცემულია 19669 ლარით მეტი, სხვადასხვა თანამდებობებზე დასაქმებული პირების თანამდებობრივი სარგოს ასანაზღაურებლად.
ხელშეკრულებით დაქირავებული დამხმარე პერსონალის რაოდენობა მნიშვნელოვნად აღემატება საშტატო რიცხოვნობიდან გამომდინარე დასაშვებ რაოდენობას და მათზე გაცემულია ხელფასი 267700 ლარი.
ვალდებულებების არსებობის პირობებში ხდება მივლინების ხარჯების გაწევა, რის გამოც 2010 წლის 1 იანვრის მდგომარეობით დავალიანებამ 38698 ლარი შეადგინა. აღსანიშნავია, რომ აუდიტის შედეგებზე ინფორმაცია გაეგზავნა საქართველოს მეცნიერებისა და განათლების სამინისტროს, რომელმაც დაავალა უნივერსიტეტის ადმინისტრაციას არსებულ დარღვევა-ნაკოლოვანებებზე რეაგირება. კონტროლს გასატარებელი ღონისძიებების შესრულებაზე მინიტორინგს საქართველოს განათლებისა და მეცნიერების სამინისტროს შიდა აუდიტის დეპარტამენტი განახორციელებს.